अब घरमै हुलाकमार्फत नेपाल टेलिकमको सिमकार्ड: मन्त्री डा. तिमिल्सिनाद्वारा ‘हुलाक–सिम सेवा’ को शुभारम्भ

काठमाडौँ, असोज २८ गते । सरकारी सेवालाई डिजिटल र नागरिकमैत्री बनाउने उद्देश्यसहित सरकारले अब नागरिकले चाहेकै स्थानमा नेपाल दूरसञ्चार कम्पनी (नेपाल टेलिकम) को सिमकार्ड उपलब्ध गराउने व्यवस्था मिलाएको छ। सूचना तथा सञ्चारमन्त्री डा. विक्रम तिमिल्सिनाले मन्त्रालयबाट एक कार्यक्रमबीच ‘हुलाक–सिम सेवा’ को शुभारम्भ गर्नुभएको हो।

यो सेवा सञ्चालनमा आएसँगै नागरिकले सिमकार्ड लिन अब दूरसञ्चार कार्यालय धाउनुपर्ने बाध्यता हटेको छ। यसअन्तर्गत ग्राहकले अनलाइनमार्फत आवेदन दिएर नयाँ प्रिपेड ‘फिजिकल’ सिमकार्ड हुलाकमार्फत आफ्नै घरदैलोमा प्राप्त गर्न सक्नेछन्।

अनलाइन आवेदनका लागि नागरिकले व्यक्तिगत विवरण, नजिकको ठेगाना, फोटो र नागरिकता वा राहदानीको प्रतिलिपिसँगै नजिकको टेलिकम काउन्टर छनोट गर्नुपर्नेछ। कागजात जाँच र आवेदन स्वीकृत भएपछि अनलाइनबाटै भुक्तानी गर्न सकिनेछ। सिमकार्डका लागि ९० रुपियाँ र हुलाक डेलिभरीका लागि ७० रुपियाँ शुल्क लाग्नेछ, जुन जुनसुकै बैंकिङ एप, डिजिटल वालेट वा नमस्ते पेमार्फत तिर्न सकिनेछ।

सहरी क्षेत्रमा अनलाइन आवेदन स्वीकृत र भुक्तानी भएको करिब दुई घण्टाभित्र र ग्रामीण भेकमा तीन दिनभित्र आवेदकलाई सिमकार्ड उपलब्ध गराउने लक्ष्य लिइएको छ। कार्यक्रममा मन्त्री डा. तिमिल्सिनाले डेलिभरीको समय थप छोट्याउन तथा पोष्टपेड सिमकार्ड लगायत अन्य प्रशासनिक सेवा पनि अनलाइनमा आधारित बनाउन निर्देशन दिनुभएको छ।