युवा शक्तिलाई उद्यमशीलता र नवप्रवर्तनमा जोड्न सरकार प्रतिबद्ध: फाइभ-जी र एआई नीतिमार्फत आर्थिक रूपान्तरणको लक्ष्य

काठमाडौँ, असोज २३ गते । सूचना तथा सञ्चारमन्त्री डा. विक्रम तिमिल्सिनाले देशको प्रमुख पुँजीका रूपमा रहेको युवा शक्तिलाई उद्यमशीलता, नवप्रवर्तन र प्रविधिसँग जोड्न सरकारले अनुकूल वातावरण निर्माण गरिरहेको बताउनुभएको छ।

नेपाल बिजनेस इन्स्टिच्युट र बैंक तथा वित्तीय संस्था परिसंघ नेपाल (सिबिफिन) द्वारा आयोजित पाँचौँ संस्करणको ‘नेपाल युवा उद्यमशीलता सम्मेलन २०२६’ लाई सम्बोधन गर्दै उहाँले सो कुरा बताउनुभएको हो।

सञ्चारमन्त्री तिमिल्सिनाले अब नेपाली युवाहरूले वैदेशिक रोजगारीका लागि श्रम र जनशक्ति पठाउनुको साटो नेपालमै बसेर सूचना प्रविधिको माध्यमबाट विश्वभर सेवा बेच्ने दिशामा अघि बढ्नुपर्नेमा जोड दिनुभयो। प्रविधिको पूर्ण उपयोगका लागि डिजिटल विभाजन अन्त्य गर्ने र दूरसञ्चारको विस्तार गर्दै यसै वर्ष नेपालमा फाइभ-जी (5G) सेवा सुरु गर्ने लक्ष्यसहित काम भइरहेको उहाँले जानकारी दिनुभयो।

कार्यक्रममा बोल्दै राष्ट्रिय योजना आयोगका सदस्य डा. सुदन झाले नेपालमा कृत्रिम बौद्धिकता (एआई – AI) को क्षेत्रमा युवाहरूको सहभागिता र लगानी बढ्दै गएको बताउनुभयो। उहाँले एआई नीतिको प्रभावकारी कार्यान्वयनमार्फत सरकारी सेवा प्रवाहमा सुधार, तथ्याङ्क सुरक्षा, उत्पादन वृद्धि र प्रतिस्पर्धी अर्थतन्त्र निर्माण गर्न सकिने स्पष्ट पार्नुभयो।

सम्मेलनमा मन्त्री तिमिल्सिनाले शिक्षालाई सैद्धान्तिक ज्ञानमा मात्र सीमित नराखी बजारको माग र भविष्यका लागि आवश्यक सीपमा आधारित बनाउनुपर्ने धारणा राख्नुभयो। प्रविधिलाई मानवीय सिर्जना र क्षमता अभिवृद्धिको माध्यमका रूपमा प्रयोग गर्दै रोजगारी र उत्पादन बढाउन सरकार, निजी क्षेत्र र शैक्षिक संस्थाबिच दरिलो सहकार्य आवश्यक रहेको सरोकारवालाहरूले बताएका छन्।