मलेसिया सरकारद्वारा श्रमिकको न्यूनतम पारिश्रमिक मासिक २ हजार रिङ्गेट पुर्‍याउने घोषणा

काठमाडौँ, असोज २४ गते । मलेसिया सरकारले त्यहाँ कार्यरत श्रमिकको न्यूनतम पारिश्रमिक मासिक तीन सय रिङ्गेटले वृद्धि गरी दुई हजार रिङ्गेट (करीब ७५ हजार रुपियाँ) पुर्‍याउने घोषणा गरेको छ। मलेसियाका प्रधानमन्त्री दातुक सेरी अनवर इब्राहिमले सन् २०२७ का लागि प्रस्तुत बजेटमार्फत सो घोषणा गर्नुभएको हो।

हाल मलेसियामा कार्यरत श्रमिकको न्यूनतम पारिश्रमिक मासिक एक हजार सात सय रिङ्गेट (६३ हजार रुपियाँ) रहेकोमा बढेको नयाँ तलबमान सन् २०२७ जुनदेखि लागु हुनेछ। यसबाट त्यहाँ कार्यरत साढे चार लाख नेपाली श्रमिकसहित ४० लाखभन्दा बढी आप्रवासी श्रमिकहरू प्रत्यक्ष रूपमा लाभान्वित हुनेछन्। मलेसियाले अदक्ष श्रमिकसँगै अर्धदक्ष र दक्ष श्रमिकको पनि पारिश्रमिक वृद्धि गर्ने भएको छ।

यसबाहेक, सरकारी स्वामित्वका र सम्बद्ध लगानी कम्पनीहरूमा कार्यरत श्रमिकको तलब पनि मासिक तीन हजार एक सयबाट बढाएर तीन हजार चार सय रिङ्गेट पुर्‍याइएको छ। १२ वर्षको अन्तरालमा मलेसियामा श्रमिकको ज्याला करिब ८९ प्रतिशतले वृद्धि भइसकेको छ।

साथै, अवैध रूपमा काम गरिरहेका श्रमिकलाई नियन्त्रण गर्न करसम्बन्धी व्यवस्थामा कडाइ गर्ने घोषणा पनि गरिएको छ।