भाडाको घरमा सुन प्रशोधन र तस्करी: २१ किलो ७५० ग्राम सुनसहित तीन जना पक्राउ

काठमाडौँ, असोज २३ गते । काठमाडौँको बुढानीलकण्ठ–२, माथिल्लो भङ्गालस्थित विदेशमा बस्ने नेपालीको घर मासिक तीन लाख ३० हजार रुपियाँ भाडामा लिएर सुन प्रशोधन तथा तस्करीको सञ्जाल सञ्चालन भइरहेको खुलेको छ।

काठमाडौँ उपत्यका अपराध अनुसन्धान कार्यालयको टोलीले बिहीबार बिहान करिब ५ बजे छापा मारी २१ किलो ७५० ग्राम सुन, प्रशोधन उपकरण र रसायनसहित तीन जना चिनियाँ नागरिकलाई पक्राउ गरेको हो।

विशेष सूचनाका आधारमा केही समयदेखि निगरानी गरिरहेको प्रहरीले शङ्कास्पद रूपमा नेपाली नम्बर प्लेटको गाडीमा बाहिर निस्कन खोजेका बेला उनीहरूलाई नियन्त्रणमा लिएको थियो। पक्राउ पर्नेहरूमा २७ वर्षीय हान फेइ, ३७ वर्षीय वाङ जियानझेन र ४७ वर्षीय झोउ लोङक्विन रहेका छन्। प्रहरीले शुक्रबार पत्रकार सम्मेलन गर्दै बरामद सुन र प्रशोधनमा प्रयोग हुने मेसिनहरू सार्वजनिक गरेको छ।

अनुसन्धानका अनुसार धुलो वा अर्धठोस स्वरूपमा नेपाल भित्र्याइएको अवैध सुनलाई उक्त घरभित्रै मेसिन र रसायनको प्रयोग गरी पगालेर बिस्कुट र ठोस आकारमा परिणत गर्ने गरिएको थियो। प्रहरीले तयारी अवस्थामा रहेको ११ वटा टुक्रामा १० किलो ९९७ ग्राम सुन र प्लास्टिकमा राखिएको अर्धठोस अवस्थाको १० किलो ७५२ ग्राम सुन बरामद गरेको छ।

कार्यालयका प्रमुख प्रहरी वरिष्ठ उपरीक्षक (SSP) सन्तोष खड्काका अनुसार बरामद सुन हङकङबाट हवाई मार्ग हुँदै नेपाल ल्याइएको हुन सक्ने आशङ्का गरिए पनि यसबारे पुष्टि हुन बाँकी छ। पक्राउ परेका चिनियाँ नागरिकहरूले बयानमा सहयोग नगरेकाले तस्करीको सञ्जाल, सुनको मुख्य गन्तव्य र नेपाली नागरिकको सम्भावित संलग्नताबारे प्रहरीले थप अनुसन्धान अघि बढाएको छ।