तीव्र गति र लापरवाहीले सप्तरीमा दुर्घटना बढ्यो: २२ दिनमा १८ दुर्घटना, ४ जनाको मृत्यु र ३३ घाइते

सप्तरी, असोज २३ गते । सवारी चालकहरूले ट्राफिक नियमको पालना नगर्ने र निर्धारित गतिभन्दा तीव्र गतिमा सवारी चलाउने प्रवृत्तिका कारण सप्तरी जिल्लामा सवारी दुर्घटनाको जोखिम अत्यधिक बढेको छ। असोज महिनाको सुरुवाती २२ दिनभित्रै जिल्लाका विभिन्न स्थानमा भएका १८ वटा सवारी दुर्घटनामा परी ४ जनाले ज्यान गुमाएका छन् भने ३३ जना घाइते भएका छन्।

जिल्ला प्रहरी कार्यालय सप्तरीले शुक्रबार आयोजना गरेको पत्रकार सम्मेलनमा सार्वजनिक विवरणअनुसार उक्त अवधिमा कुल २३ वटा सवारीसाधन दुर्घटनामा परेका थिए। दुर्घटनालगत्तै प्रहरी टोलीले ३० जना घाइते तथा प्रभावितहरूको तत्काल उद्धार गरेको जनाएको छ।

प्रहरी उपरीक्षक रुपक खड्काका अनुसार लेन अनुशासनको बेवास्ता, तीव्र गति तथा मादक पदार्थ वा लागुऔषध सेवन (मापसे/लापसे) गरी सवारी चलाउनु नै दुर्घटनाका मुख्य कारण हुन्। विशेष गरी विस्तार भइरहेको पूर्व-पश्चिम राजमार्ग खण्डमा चालकहरूले गति सीमा र सडक सुरक्षा नियम पालना नगर्दा गम्भीर दुर्घटनाहरू भइरहेका छन्।

यसैबिच, नियम उल्लङ्घन गर्ने सवारीसाधनमाथि प्रहरीले कारबाही प्रक्रियालाई तीव्र बनाएको छ। असोज महिनाको २२ दिनमा मात्रै नियम उल्लङ्घन गर्ने १६३ वटा सवारीसाधनलाई कारबाही गरी १ लाख ७३ हजार ५०० रुपियाँ जरिवाना सङ्कलन गरिएको प्रहरी नायब उपरीक्षक हेमराज घिमिरेले जानकारी दिनुभयो।