मिथिला क्षेत्रमा छठ पर्वको तयारी तीव्र : गाउँबस्ती र बजारमा छठमय चहलपहल

महोत्तरी, कात्तिक २७ गते । दीपावली पर्व सकिएसँगै कात्तिक शुक्ल चतुर्थीदेखि सुरु भएको महोत्तरीको महापंर्व छठका अवसरमा महोत्तरीसहित सम्पूर्ण मिथिला क्षेत्रका गाउँ-बस्ती र बजारहरूमा अभूतपूर्व चहल-पहल बढेको छ।

चार दिनसम्म विभिन्न विधिपूर्वक मनाइने यस पवित्र पर्वको स्वागत र तयारीका लागि स्थानीयवासीहरू तन-मनका साथ जुटेका छन्। सूर्यदेव र षष्ठीदेवीको महिमा गाइने पारंपरिक भक्ति-गीतले सम्पूर्ण मिथिलाको वातावरणलाई पूर्ण रूपमा छठमय बनाएको छ। नदी-किनार, पोखरी तथा जलाशयहरूमा छठघाट निर्माण, सर-सफाइ र सजावटको काममा विशेष गरी युवाहरू सक्रिय रूपमा खटिएका छन्।

पर्वको तयारीले स्थानीय बासिन्दाहरूको दैनिकी पूर्ण रूपमा पर्व-केन्द्रित बनेको छ। बजारहरूमा केराका घरीसहित पूजामा आवश्यक पर्ने उखु, अदुवा, बेसार, ज्यामिर तथा बाँसका चोयाबाट निर्मित ढकी, डलिया, नाङ्लो र माटाका भाँडाहरू खरिद गर्नेहरूको अत्यधिक भीड लागेको छ।

शुद्धता र पवित्रतालाई सर्वोपरि मानिने यस पर्वमा घरघरमा ठकुवा, भुसुवासहितका प्रसादहरू तयार पार्ने चटारो गृहिणीहरूलाई परेको छ। चामल र गहुँको पिठो ढिकी र जाँतोमा कुट्ने तथा पिँध्ने पुरानो परम्परा यहाँ अझै पनि जीवन्त रूपमा कायम रहेको देखिन्छ।

कात्तिक शुक्ल चतुर्थीका दिन ‘नहाय–खाय’ विधिबाट औपचारिक रूपमा सुरु हुने यस पर्वअन्तर्गत दोस्रो दिन ‘खरना’, तेस्रो दिन साँझ अस्ताउँदो सूर्यलाई र चौथो दिन बिहान उदाउँदो सूर्यलाई अर्घ अर्पण गरेर छठ पर्व समापन गरिन्छ। पर्वका यी विधिहरूले पारिवारिक सुख, शान्ति र समृद्धि ल्याउने जन-विश्वास रहिआएको छ।

छठ पर्वको अर्को ठुलो विशेषता भनेको सामाजिक सद्भाव हो। यस पर्वमा पुराना सबै मन-मुटावहरू बिर्सेर जात-जाति र समुदायको भेदबिना सबै नागरिकहरू एकै ठाउँमा भेला भई समान रूपमा सूर्यदेवको आराधना गर्ने गर्दछन्। यसले समाजमा आपसी प्रेम, सहयोग र सद्भावलाई अझ प्रगाढ बनाउन ठुलो योगदान पुर्‍याएको छ।