भीमफेदी माइक्रोबस दुर्घटनाप्रति गगनकुमार थापाद्वारा गहिरो दुःख व्यक्त : निधनप्रति श्रद्धाञ्जली

काठमाडौँ, कात्तिक २६ गते । नेपाली कांग्रेसका सभापति गगनकुमार थापाले मकवानपुरको भीमफेदी गाउँपालिका–६, चिसापानी गढीमा भएको गम्भीर यात्रुवाहक माइक्रोबस दुर्घटनाप्रति गहिरो दुःख तथा वेदना व्यक्त गर्नुभएको छ।

आज एक शोक वक्तव्य जारी गर्नुहुँदै सभापति थापाले काठमाडौंबाट सर्लाहीको सुन्दरपुरतर्फ जाँदै गरेको माइक्रोबस दुर्घटनामा परी १३ जनाको ज्यान गएको हृदयविदारक खबरले आफू अत्यन्त स्तब्ध र मर्माहत भएको बताउनुभएको छ।

उहाँले दुर्घटनामा परी अमूल्य जीवन गुमाउने मृतकहरूप्रति भावपूर्ण श्रद्धाञ्जली अर्पण गर्दै शोकसन्तप्त सम्पूर्ण परिवारजनमा गहिरो समवेदना प्रकट गर्नुभएको छ। साथै, दुर्घटनामा परि गम्भीर घाइते भएकाहरूको शीघ्र स्वास्थ्यलाभको पूर्ण कामना गर्दै यस असह्य र पीडादायी घडीमा परिवारजनलाई धैर्य धारण गर्ने शक्ति प्राप्त होस् भनी कामना गर्नुभएको छ।

भीमफेदी–कुलेखानी–काठमाडौँ सडकखण्ड अन्तर्गत आज बिहान चिसापानी गढीमा यात्रुवाहक माइक्रोबस सडकबाट करिब ७०० मिटर तल खसेर निकै ठुलो दुर्घटना भएको थियो। यस भयानक दुर्घटनामा १० जनाको घटनास्थल तथा उपचारका क्रममा निधन भएको छ भने अन्य छ जना घाइते भएका छन्। प्रहरीको प्रारम्भिक जानकारी अनुसार मृतकमध्ये हालसम्म दुई जनाको मात्र पहिचान खुलेको छ भने बाँकी मृतकहरूको पहिचान खुलाउने कार्य जारी रहेको छ।

पछिल्लो समय हिमाली तथा पहाडी सडक मार्गहरूमा भइरहने यस्ता दुर्घटनाहरूले ठुलो मानवीय क्षति निम्त्याइरहेकोप्रति चिन्ता व्यक्त गर्दै सडक सुरक्षा र यातायात व्यवस्थापनलाई अझ बढी प्रभावकारी तथा सुरक्षित बनाउन सम्बन्धित निकायको ध्यान जानुपर्नेमा जोड दिइएको छ।