महागुरु फाल्गुनन्दको मार्गनिर्देशले समाजलाई नैतिक, सभ्य र एकताबद्ध बनाएको छ : राष्ट्रपति पौडेल

काठमाडौँ, कात्तिक २५ गते । राष्ट्रपति रामचन्द्र पौडेलले किराँत धर्मावलम्बीका महान् गुरु महागुरु फाल्गुनन्दको जन्म-जयन्तीको सु-अवसरमा स्वदेश तथा विदेशमा रहनुहुने सम्पूर्ण नेपाली दिदी-बहिनी तथा दाजु-भाइहरूमा सुख, शान्ति र समृद्धिको हार्दिक मङ्गलमय शुभकामना व्यक्त गर्नुभएको छ।

उहाँले आफ्नो शुभकामना सन्देशमार्फत महागुरु फाल्गुनन्दको मार्गनिर्देशले वर्तमान नेपाली समाजलाई नैतिक, सभ्य र एकताबद्ध बनाउन महत्त्वपूर्ण भूमिका खेलेको स्पष्ट पार्नुभएको छ। समाजमा विद्यमान विभिन्न रूढीवादी कु-संस्कारको अन्त्य गरी समाजलाई सही र मार्गदर्शक बाटो देखाउन फाल्गुनन्दले पुर्याउनुभएको योगदान सधैँ स्मरणीय रहने उहाँको भनाइ छ।

महागुरुको मार्गदर्शनले धार्मिक, सामाजिक तथा सांस्कृतिक विविधताबीच आपसी सहिष्णुता र सद्भाव कायम गर्दै राष्ट्रिय एकतालाई थप सुदृढ तथा सबल बनाउन ठुलो योगदान पुर्याएको राष्ट्रपति पौडेलले औँल्याउनुभएको छ।

किराँत धर्म र संस्कृतिको मौलिक पहिचान तथा संरक्षणमा विशिष्ट योगदान पुर्याउनुहुने राष्ट्रिय विभूति फाल्गुनन्दले समाज सुधारका लागि खेलेको अग्रणी भूमिकाको कदर गर्दै नेपालका विभिन्न जिल्लाहरूमा विशेष कार्यक्रमहरूको आयोजना गरी उहाँको जन्मजयन्ती हर्षोल्लासपूर्वक मनाउने गरिएको सन्देशमा उल्लेख गरिएको छ।

धार्मिक गुरु तथा सामाजिक अभियन्ताका रूपमा ख्यातिप्राप्त महागुरु फाल्गुनन्दले समाज सुधारक भई धर्म, भाषा, लिपि र परम्पराको संरक्षण तथा विकासमा समेत अतुलनीय कार्य गर्नुभएको राष्ट्रपतिको भनाइ छ। उहाँले समाजमा सत्य, अहिंसा, दया र परोपकारको भावना जागृत गराउँदै मानव कल्याणका लागि जीवन समर्पित गर्नुभएको थियो।

अन्ततः, महागुरु फाल्गुनन्द जयन्तीले सम्पूर्ण नेपालीमा आपसी सहिष्णुता, सद्भाव, सुशासन, अहिंसा एवं समाज सुधारको पवित्र अभियानमा सधैँ सक्रिय भइरहन थप प्रेरणा प्रदान गरोस् भनी राष्ट्रपति पौडेलले कामना गर्नुभएको छ।