नेपाल संवत् नेपालको मौलिक इतिहास, सभ्यता र राष्ट्रिय पहिचानको प्रतीक हो : संयोजक पुष्पकमल दाहाल ‘प्रचण्ड’

काठमाडौँ, कात्तिक २४ गते । नेपाल कम्युनिष्ट पार्टी (नेकपा) का संयोजक तथा पूर्वप्रधानमन्त्री पुष्पकमल दाहाल ‘प्रचण्ड’ ले नेपाल संवत् ११४७ को सु-अवसरमा स्वदेश तथा विदेशमा रहनुहुने सम्पूर्ण नेपाली दिदी-बहिनी तथा दाजु-भाइहरूमा सुख, शान्ति, सु-स्वास्थ्य र समृद्धिको हार्दिक मङ्गलमय शुभकामना व्यक्त गर्नुभएको छ।

नेपाल संवत् प्रारम्भ भएको यस पवित्र अवसरमा शुभकामना दिनुहुँदै उहाँले यो संवत् नेपालको मौलिक इतिहास, सभ्यता, संस्कृति र राष्ट्रिय पहिचानसँग गहिरो रूपमा जोडिएको स्पष्ट पार्नुभएको छ।

संयोजक दाहालले आफ्नो नेतृत्वमा रहेको पहिलो गणतन्त्रात्मक सरकारले विसं २०६५ सालमा नेपाल संवत्लाई ‘राष्ट्रिय संवत्’ का रूपमा मान्यता प्रदान गर्ने ऐतिहासिक घोषणा गरेको प्रसङ्ग स्मरण गर्नुभएको छ। यसले नेपालका मौलिक संस्कृति र संवत्लाई राज्यस्तरबाटै उचित सम्मान दिएको उहाँको भनाइ छ।

राष्ट्रिय विभूति शङ्खधर साख्वाःले पुर्याउनु भएको विशिष्ट र प्रेरणादायी योगदानको उच्च सम्मान गर्दै, उहाँले विसं ९३७ (इसं ८८०) मा गरिब तथा किसान जनताको ऋणमोचन गरेर यो संवत् सुरु गराएको ऐतिहासिक तथ्यको उल्लेख गर्नुभएको छ।

लिच्छविकालिन राजा राघवदेवको शासनकालमा सुरु भएको नेपाल संवत् नेपालकै एकमात्र मौलिक संवत् भएको उल्लेख गर्दै संयोजक दाहालले यस पर्वले सम्पूर्ण नेपालीबीच राष्ट्रिय एकता, सामाजिक सद्भाव, आपसी सहिष्णुता र समृद्धिको भावनालाई अझ बढी सुदृढ बनाउन सबैमा प्रेरणा प्रदान गरोस् भनी कामना गर्नुभएको छ।

अन्ततः, नेपालका यस्ता ऐतिहासिक तथा सांस्कृतिक पर्वहरूले हामी सबैलाई एकताबद्ध भएर राष्ट्रिय हित र समृद्धिको साझा यात्रामा अगाडि बढ्न सधैँ ऊर्जा प्रदान गर्ने विश्वास उहाँले व्यक्त गर्नुभएको छ।