दशौँ राष्ट्रिय खेलकुद : कुल ३२ मध्ये २३ खेल मुख्य आयोजक स्थल सुर्खेतमै हुने निश्चित

काठमाडौँ, कात्तिक २४ गते । कर्णाली प्रदेशमा पहिलोपटक आयोजना हुन लागेको भव्य खेलकुद महाकुम्भ ‘दशौँ राष्ट्रिय खेलकुद’ का लागि खेलहरूको स्थान निश्चित भएको छ।

भौगोलिक कठिनाइ र पूर्वाधारको सीमितताका बीच प्रतियोगितामा समावेश कुल ३२ खेलमध्ये २३ वटा खेल मुख्य आयोजक स्थल सुर्खेतमै सञ्चालन हुने पक्का भएको छ। प्राविधिक समितिबाट अनुमोदित तालिका अनुसार प्रतियोगिताको औपचारिक उद्घाटन मंसीर १६ गते नवनिर्मित सुर्खेत रंगशालामा हुनेछ भने समापन मंसीर २७ गते हुने तय गरिएको छ।

तर, औपचारिक उद्घाटनअघि नै मंसीर ८ गतेदेखि नै क्रिकेट, फुटबल, ह्यान्डबल, बास्केटबल, टेनिस र पौडीसहितका ६ वटा खेलहरूको प्रतिस्पर्धा सुरु हुनेछ।

मुख्य आयोजक जिल्ला सुर्खेतमा एथ्लेटिक्स, पुरुष फुटबल, क्रिकेट, भलिबल, हक्की, रग्बी, साइक्लिङ लगायतका मैदानी खेलहरू हुनेछन्। यसैगरी कराते, तेक्वान्दो, उसु, बक्सिङजस्ता फाइटिङ खेलका साथै ब्याडमिन्टन, टेबल टेनिस, जिम्न्यास्टिक, स्क्वास, बास्केटबल, कबड्डी, आर्चरी, भारत्तोलन, ईस्पोर्ट्स र सेपाकताक्रो समेत गरी कुल २३ खेलहरू सुर्खेतमै सम्पन्न हुनेछन्।

बाँकी खेलहरू भने कर्णालीका अन्य जिल्ला तथा भौगोलिक अनुकूलताका आधारमा छिमेकी लुम्बिनी प्रदेशमा समेत बाँडफाँड गरिएको छ।

कर्णाली प्रदेशका अन्य चार जिल्लामा पूर्वाधारको अवस्था हेरी केही खेलहरू राखिएको छ। जसअनुसार दैलेखमा आईटीएफ तेक्वान्दो, कालिकोटमा बुद्धिचाल, सल्यानमा जुडो र कुस्ती तथा पश्चिम रुकुममा शारीरिक सुगठनका खेलहरू आयोजना हुनेछन्।

यसका साथै, कर्णालीमा आवश्यक भौतिक पूर्वाधारको अभावका कारण पौडी र सुटिङका खेलहरू नेपालगञ्ज (बाँके) तथा टेनिस र खो–खोका खेलहरू बर्दिया जिल्लामा सञ्चालन गर्ने निर्णय गरिएको छ।

यसरी कुल ३२ खेलहरूलाई सुर्खेत, कर्णालीका अन्य चार जिल्ला र लुम्बिनी प्रदेशका दुई जिल्लामा विभाजन गरेर व्यवस्थित रूपमा दशौँ राष्ट्रिय खेलकुद सम्पन्न गर्न सम्पूर्ण तयारी तीव्र पारिएको छ।