एनपीएल: आज दुई रोमाञ्चक खेल हुँदै, सुदूरपश्चिम र कर्णाली तथा चितवन र पोखरा भिड्दै

काठमाडौँ, कात्तिक २० गते । तेस्रो संस्करणको नेपाल प्रिमियर लिग (एनपीएल) टी–२० क्रिकेट प्रतियोगिताअन्तर्गत आज कीर्तिपुरस्थित त्रिभुवन अन्तरराष्ट्रिय क्रिकेट मैदानमा दुई महत्वपूर्ण खेलहरू हुँदैछन्।

दिनको पहिलो खेलमा सुदूरपश्चिम रोयल्स र कर्णाली याक्स मध्याह्न १२:३० बजे आमनेसामने हुनेछन् भने दोस्रो खेलमा चितवन राइनोज र पोखरा एभेन्जर्स अपराह्न ५:०० बजे प्रतिस्पर्धा गर्नेछन्। जारी प्रतियोगितामा आफ्नो स्थिति बलियो बनाउन यी सबै टिमहरूका लागि आजको खेल निकै निर्णायक मानिएको छ।

पहिलो खेलमा प्रतिस्पर्धा गर्न लागेको कर्णाली याक्सले यसअघि खेलेका तीन खेलमध्ये दुईमा जित र एकमा हार व्यहोरेको छ भने लगातार दुई जित निकालेको कर्णाली गत खेलमा काठमाण्डु गोर्खाजविरुद्ध पराजित भएको थियो। आज सुदूरपश्चिमलाई हराउँदै तेस्रो जित निकाल्ने दाउमा कर्णाली रहेको छ।

यता, चार खेलमा दुई जित र दुई हारको नतिजा निकालेको सुदूरपश्चिम रोयल्स पनि आज कर्णालीलाई पराजित गर्दै अंकतालिकामा सुधार गर्ने र लगातार दोस्रो जितको खोजीमा मैदान उत्रिनेछ।

त्यसैगरी, आजको दोस्रो खेलमा अहिलेसम्म जितविहीन रहेको पोखरा एभेन्जर्सले बलियो प्रतिद्वंद्वी चितवन राइनोजको सामना गर्नेछ। कुशल भुर्तेलको कप्तानीमा रहेको पोखरा यसअघिका तीनटै खेलमा पराजित भइसकेको छ र आज चितवनलाई हराउँदै प्रतियोगितामा पहिलो जितको खाता खोल्ने दाउमा छ।

अर्कोतर्फ, चितवन राइनोज भने चार खेलमा दुई जित, एक हार र एक खेल वर्षाका कारण रद्द भई अंक बाँडेको अवस्थामा छ। कमजोर देखिएको पोखराविरुद्ध जित हासिल गर्दै प्लेअफ सम्भावनालाई बलियो बनाउने लक्ष्यमा चितवन मैदान उत्रनेछ।

जारी एनपीएलमा कुल आठ वटा टोलीले प्रतिस्पर्धा गरिरहेका छन् भने आज हुने यी दुई खेलले अंकतालिकाको समिकरणमा ठुलै फेरबदल ल्याउने अपेक्षा गरिएको छ।