संगीतमय इटहरी रंगशाला: जब गुञ्जियो नेपथ्यको गीत, झुमे इटहरीबासी

इटहरी, कात्तिक १९ गते । सुनसरीको इटहरी रंगशालामा बुधबार साँझ आयोजित सांगीतिक कार्यक्रममा राष्ट्रिय ख्यातिप्राप्त ब्यान्ड ‘नेपथ्य’ का लोकप्रिय गायक अमृत गुरुङको प्रस्तुतिले सिंगो रंगशालालाई संगीतमय र उत्साहपूर्ण बनायो।

“नमस्ते इटहरी, नमस्ते कोशी प्रदेश” भन्दै मञ्चमा उक्लिनुभएका गायक गुरुङले ‘गाउँ गाउँबाट उठ’, ‘सुन् सुन् साइँली’, ‘रेशम’, ‘कर्णाली’, ‘भेडाको उन’ लगायतका दर्जनौँ सदाबहार गीतहरू प्रस्तुत गर्नुभयो। गुरुङको सुमधुर स्वर र सांगीतिक धुनसँगै दर्शकहरू ताली बजाउँदै, उफ्रिँदै र सिटी फुक्दै खुलेर झुमेका थिए।

पूर्वाञ्चल इभेन्ट्स प्रालिको आयोजनामा भएको यो कन्सर्ट नेपथ्यले इटहरीमा दिएको पहिलो सांगीतिक प्रस्तुति हो। गीत-संगीतको मनोरञ्जनसँगै गायक गुरुङले दर्शकहरूसँग आत्मीय संवाद गर्दै समाजमा सामाजिक सद्भाव, राष्ट्रिय एकता र मानवीय सेवाको महत्त्वपूर्ण सन्देश दिनुभयो। जात-जाति र धर्मका नाममा विभाजित नभई सबैभन्दा पहिले आफूहरू नेपाली भएर बाँच्नुपर्ने उहाँको भनाइले दर्शकको मन छोएको थियो।

साथै, कलेज जीवनका पुराना स्मृतिहरू साट्दै उहाँले दर्शकहरूलाई हँसाउनुका साथै पुराना दिनको स्मरण गराउनुभएको थियो।

कार्यक्रमका क्रममा गायक गुरुङले धन-सम्पत्ति कमाउनुका साथै समाजका अशक्त, असहाय र दुःखमा परेका व्यक्तिहरूलाई आफूले सकेको दान र सहयोग गर्नुपर्ने दायित्व रहेको औँल्याउनुभयो। राष्ट्रसेवक कर्मचारी, राजनीतिक दलका नेता र समाजका अगुवाहरूलाई आफ्नो आम्दानीको केही अंश सामाजिक सेवामा छुट्याउन उहाँले आग्रह गर्नुभयो।

देश निर्माण सबैको साझा जिम्मेवारी भएको बताउँदै उहाँले नेपाली युवाहरूले विदेशिनुपर्ने बाध्यताको अन्त्य गरी स्वदेशमै अवसर सिर्जना गर्नुपर्नेमा जोड दिनुभयो। नेपालको हिमाल, पहाड र तराईको विविधताले भरिएका प्राकृतिक तथा सांस्कृतिक सम्पदाको अवलोकन गर्न र आन्तरिक पर्यटन प्रवर्द्धन गर्न समेत उहाँले सबैलाई आह्वान गर्नुभयो।

यस प्रकारका भव्य सांगीतिक कार्यक्रमले एकातिर कला र संस्कृतिको जगेर्ना गरेको छ भने अर्कोतर्फ स्थानीय तहमा आर्थिक गतिविधि बढाउन र आन्तरिक पर्यटन प्रवर्द्धन गर्न ठुलो सहयोग पुर्‍याएको आयोजक संस्थाका प्रबन्ध निर्देशक कुलबहादुर कार्कीले बताएका छन्।