सुशासनको आधार सार्वजनिक स्रोतको सदुपयोग र भ्रष्टाचारप्रति शून्य सहनशीलता हो : राष्ट्रपति रामचन्द्र पौडेल

काठमाडौँ, कात्तिक १८ गते । राष्ट्रपति रामचन्द्र पौडेलले सार्वजनिक स्रोतसाधनको सदुपयोग, भ्रष्टाचारप्रति शून्य सहनशीलता, कानुनको शासन र नैतिक आचरण नै सुशासनको मुख्य आधार भएको बताउनुभएको छ।

दक्षिणकाली नगरपालिकाको नवनिर्मित प्रशासकीय भवनको उद्घाटन गर्दै उहाँले सङ्घीय लोकतान्त्रिक गणतन्त्र स्थापनाका लागि जनताले गरेका त्याग र बलिदानको मूल उद्देश्य पनि यही सुशासन कायम गर्नु रहेको प्रस्ट पार्नुभयो। तीनै तहका सरकारहरू जनताका यी अपेक्षा र भावनालाई पूरा गर्न गम्भीर हुनुपर्ने उहाँको भनाइ थियो।

जनप्रतिनिधि तथा राष्ट्रसेवक कर्मचारीहरूलाई लक्षित गर्दै राष्ट्रपति पौडेलले सार्वजनिक पद र जिम्मेवारीलाई व्यक्तिगत सुविधा वा अधिकारका रूपमा नभई जनताको सेवा गर्ने ठुलो अवसर र दायित्वका रूपमा लिन आग्रह गर्नुभयो।

नयाँ भवन केवल भौतिक संरचना मात्र नभई जनताले सेवा प्राप्त गर्ने विश्वासको केन्द्र, लोकतान्त्रिक व्यवस्थाको स्थानीय आधारस्तम्भ र नागरिकका आकांक्षा सम्बोधन गर्ने संस्थाको प्रतीक भएको उहाँले औँल्याउनुभयो। यस भवनबाट प्रवाह हुने सेवाहरू छिटो, छरितो, पारदर्शी र पूर्ण रूपमा नागरिकमैत्री बन्न सक्नुपर्नेमा उहाँले जोड दिनुभयो।

भौतिक पूर्वाधार आधुनिक बन्दै गएजस्तै प्रशासनिक कार्यशैली पनि आधुनिक, प्रविधिमैत्री र परिणाममुखी हुन उत्तिकै आवश्यक रहेको राष्ट्रपति पौडेलले बताउनुभयो। सूचना प्रविधिको अधिकतम प्रयोग, व्यवस्थित अभिलेख प्रणाली, डिजिटल सेवा र प्रभावकारी गुनासो सुनुवाइ प्रणाली आजको प्रमुख आवश्यकता भएको उहाँको धारणा थियो। यसले स्थानीय स्तरमा सुशासनको अनुभूति गराउन मद्दत पुग्नेछ।

कार्यक्रममा राष्ट्रपति पौडेलले दक्षिणकाली क्षेत्रमा धार्मिक पर्यटनसँगै प्रकृति, संस्कृति र स्थानीय उत्पादनमा आधारित पर्यटन विकास गर्ने प्रचुर सम्भावना रहेको उल्लेख गर्दै यस तर्फ विशेष ध्यान दिन स्थानीय नेतृत्वलाई आग्रह गर्नुभयो। यस्ता पूर्वाधारहरूले स्थानीय सरकारको कार्यक्षमता बढाउनुका साथै जनतालाई नजिकैबाट सेवा प्रवाह गर्न महत्त्वपूर्ण टेवा पुर्‍याउने विश्वास गरिएको छ।