एनपिएल : पोखरालाई ८ विकेटले पराजित गर्दै लुम्बिनी लायन्स अंक तालिकाको शीर्ष स्थानमा

काठमाडौँ, कात्तिक १७ गते । नेपाल प्रिमियर लिग (एनपिएल) सिजन थ्री अन्तर्गत मंगलबार सम्पन्न दिनको दोस्रो खेलमा लुम्बिनी लायन्सले पोखरा एभेन्जर्समाथि ८ विकेटको शानदार जित हात पारेको छ।

यस जितसँगै लुम्बिनी ३ खेलमा ५ अंकसहित अंक तालिकाको शीर्ष स्थानमा उक्लिएको छ र जारी प्रतियोगितामा एक्लो अपराजित टोली बनेको छ। पहिलो जितको खोजीमा रहेको पोखरा भने ३ खेलमा जितविहीन रहँदै अंक तालिकाको पुछारमा धकेलिएको छ। पोखराले दिएको ९८ रनको सामान्य लक्ष्य लुम्बिनीले ५० बल बाँकी छँदै २ विकेट गुमाएर सहजै भेटायो।

ओपनर आसिफ शेख ७ रनमा रनआउट भए भने डार्सी सर्ट १३ रन बनाएर आउट भए। त्यसपछि क्रिज सम्हालेका कप्तान रोहित पौडेल र निरोशन डिकवेलाले उत्कृष्ट ब्याटिङ गर्दै अविजित ७७ रनको साझेदारी गरेर टोलीलाई सहज जित दिलाए। कप्तान रोहितले ४७ रन र डिकवेलाले २७ रन बनाए। पोखराका लागि विपिन खत्रीले मात्र १ विकेट लिन सफल भए। यसअघि टस जितेर पहिले फिल्डिङ रोजेको लुम्बिनीले कसिलो बलिङ गर्दै पोखरालाई २० ओभरमा ९ विकेटको क्षतिमा ९७ रनमै रोकेको थियो।

पोखराको ब्याटिङ लाइनअप यस खेलमा पनि पूर्णरूपमा असफल भयो। अर्जुन कुमाल (शून्य), विपिन आचार्य (७), र खराब सट सेलेक्सनका सिकार बनेका कप्तान कुशल भुर्तेल (१४) सस्तोमै आउट भए। त्यस्तै, अन्तर्राष्ट्रिय स्टार शकिब अल हसन पनि ३ रनमै पभेलियन फर्के। पोखराका लागि चमिका करुणारत्नेले सर्वाधिक २५ रन बनाए भने माहेदी हसनले १३ र किरण ठगुन्नाले १२ रन जोडे। नवौँ विकेटका लागि चमिका र विपिन खत्रीले बनाएको २१ रनको साझेदारी नै इनिङ्सको सबैभन्दा ठूलो साझेदारी बन्यो।

पोखरालाई दबाबमा राख्ने क्रममा लुम्बिनीका बलर ट्रम्पलमनले उत्कृष्ट बलिङ गर्दै ३ विकेट लिए। त्यस्तै, तिलक राज भण्डारीले २ विकेट तथा किशोर महतो, कप्तान रोहित पौडेल र अभिषेक गौतमले १–१ विकेट हात पारे। पोखराका ब्याटरहरूले कुनै पनि समय खेलमा पकड जमाउन नसक्दा लगातार तेस्रो हार व्यहोर्न बाध्य भएका छन्।