काठमाडौँ हरर फिल्म फेस्टिभल : आकाश धिमालद्वारा निर्देशित नेपाली लघुचलचित्र ‘नर’ उत्कृष्ट घोषित

काठमाडौँ, कात्तिक १७ गते । नेपाली लघुचलचित्र ‘नर’ दोस्रो काठमाडौँ हरर फिल्म फेस्टिभल–२०२६ मा सर्वश्रेष्ठ लघुचलचित्र घोषित भएको छ।

रसियन हाउस काठमाडौँमा आयोजित भव्य समापन समारोहमा कुल १८ वटा लघुचलचित्रहरूलाई पछि पार्दै दर्शकहरूको मतका आधारमा आकाश धिमालद्वारा निर्देशित ‘नर’ उत्कृष्ट बन्न सफल भएको हो। त्यस्तै, दर्शकहरूकै मतका आधारमा नादिम ताबेतद्वारा निर्देशित ‘इन दी डार्कनेस आई सी यु’ उत्कृष्ट फिचर चलचित्र चुनिएको छ, जुन फ्रान्स, लेबनान, कतार र साउदी अरेबियाको संयुक्त निर्माण हो।

विविध चलचित्र प्रदर्शन र पुरस्कार वितरण समारोहका साथ आइतबार यस वर्षको हरर फिल्म फेस्टिभलको दोस्रो संस्करण सम्पन्न भएको छ। प्रतिकूल मौसमका बाबजुद पनि महोत्सवका तीनवटै दिन दर्शकहरूको उत्साहजनक र ठुलो उपस्थिति रहेको आयोजकले जानकारी दिएका छन्।

समापन समारोहको विशेष आकर्षणका रूपमा मोराद मुस्तफाद्वारा निर्देशित अन्तर्राष्ट्रिय चलचित्र ‘आयशा कान्ट फ्लाई अवे’ प्रदर्शन गरिएको थियो। इजिप्ट, फ्रान्स, जर्मनी, साउदी अरब र ट्युनिसियाको सहकार्यमा बनेको यो चलचित्र काइरोको एक बस्तीमा बस्ने आप्रवासी सेवाकर्मी आयशाको सङ्घर्षमा आधारित छ।

समापन समारोहमा नेपाल सङ्गीत तथा नाट्य प्रज्ञा–प्रतिष्ठानका कुलपति ब्रजेश खनालले नेपालमा हरर विधाका चलचित्रहरूको प्रवर्धन गर्ने यस किसिमको पहल अत्यन्तै सराहनीय रहेको बताए। त्यसैगरी, नेपालस्थित रुसी सङ्घीय दूतावासका मिनिस्टर काउन्सिलर तथा उपनियोग प्रमुख रिनचेन राक्सायेभले चलचित्रको माध्यमबाट नेपाल र रुसबीचको सांस्कृतिक सम्बन्ध र आदानप्रदान अझ सुदृढ हुने विश्वास व्यक्त गरे।

उक्त समापन समारोहमा पूर्ववातावरण, विज्ञान तथा प्रविधिमन्त्री गणेश शाह, रसियन हाउस काठमाडौँकी निर्देशक अनास्तासिया खोख्लोभा तथा नेपाल फिल्म तथा सांस्कृतिक प्रतिष्ठानका अध्यक्ष केपी पाठक लगायतका विशिष्ट व्यक्तिहरूको उपस्थिति रहेको थियो। यस महोत्सवले नेपालमा अन्तर्राष्ट्रिय स्तरका विधागत चलचित्रहरूको बजार र दर्शकहरू बढाउन महत्त्वपूर्ण भूमिका खेलेको छ।