अमेरिकामा आज मध्यावधि निर्वाचन : राष्ट्रपति ट्रम्पको कार्यशैलीको जनमत सङ्ग्रहका रूपमा हेरिएको चुनावमा सिनेट र प्रतिनिधि सभाका लागि कडा प्रतिस्पर्धा

काठमाडौँ, कात्तिक १७ गते । अमेरिकामा आज मङ्गलबार ऐतिहासिक मध्यावधि निर्वाचन हुँदै छ । वर्तमान राष्ट्रपति डोनाल्ड ट्रम्पको कार्यकालको आधा अवधि पूरा भएपछि हुने यो निर्वाचनलाई उहाँको प्रशासनको लोकप्रियताको मापन वा परीक्षाका रूपमा हेरिएको छ ।

संसद्मा आफ्नो नियन्त्रण कायम राख्न सत्तारूढ रिपब्लिकन पार्टीका लागि यो निर्वाचन निकै चुनौतीपूर्ण बनेको छ भने संसद्का दुवै सदन—प्रतिनिधि सभा (कङ्ग्रेस) र माथिल्लो सदन (सिनेट)—मा डेमोक्रेटिक र रिपब्लिकन पार्टीबीच तीव्र प्रतिस्पर्धा देखिएको छ । निर्वाचन प्रचार-प्रसारका क्रममा दुवै पक्षबाट ठुलो धनराशि खर्च गरिएको छ भने निर्वाचनको पूर्वसन्ध्यामा सङ्घीय निर्वाचन आयोगको विद्युतीय प्रणालीमा ह्याकरहरूले अवरोध पुर्‍याएपछि प्राविधिक सुरक्षाको विषयलाई लिएर उच्च सतर्कतासमेत अपनाइएको छ।

द न्युयोर्क टाइम्स तथा सिएना कलेजको अन्तिम मत सर्वेक्षण अनुसार सिनेटको नियन्त्रण निर्धारण गर्ने सातवटा प्रमुख राज्यहरू—मिसिगन, कान्सास, टेक्सस, मेन, ओहायो, अलास्का र आयोवामा डेमोक्रेटिक पार्टीका उम्मेदवारहरू अगाडि देखिएका छन् । विशेष गरी टेक्ससमा जेम्स तालारिकोले केन प्याक्सटनलाई, कन्सासमा क्रिस ह्यामिल्टनले रोजर मार्सललाई र मेनमा ग्राहम प्लाटनरले सुसान कोलिन्सलाई पछाडि पार्नुभएको छ ।

त्यस्तै ओहायोमा सेरोड ब्राउन, अलास्कामा मेरी पेल्टोला, आयोवामा जोस टुरेक र मिसिगनमा अब्दुल एल–सायेदले आफ्नो अग्रता कायम राख्नुभएको छ । हाल सिनेटमा ५३ सिटसहित रिपब्लिकनको बहुमत रहे पनि बहुमतका लागि आवश्यक पर्ने थप चार सिट जित्न डेमोक्रेटहरूले कडा कसरत गरिरहेका छन् ।

यस निर्वाचनमा बढ्दो जीवनयापन खर्च (महँगी) र आर्थिक नीतिहरू मतदाताका लागि प्रमुख मुद्दा बनेका छन् । राष्ट्रपति ट्रम्पको कार्यसम्पादनप्रतिको असन्तुष्टिलाई उपयोग गर्दै डेमोक्रेटहरूले कङ्ग्रेसको दौडमा बलियो उपस्थिति जनाएका छन् । सर्वेक्षणहरूले डेमोक्रेटहरूले सिनेटको नियन्त्रण प्राप्त गर्ने सम्भावना रहेको देखाए तापनि अन्तिम निर्णय मतदाताको हातमा नै रहेको छ ।

अमेरिकी मध्यावधि निर्वाचनले देशको आगामी राजनीतिक दिशा तय गर्ने भएकाले यसलाई विश्वभर चासोका साथ हेरिएको छ । यस निर्वाचनमा राष्ट्रपति पदका लागि मतदान नभए पनि संसद् र राज्यस्तरका महत्त्वपूर्ण पदहरूको छिनोफानो हुने हुनाले यसले आगामी दिनमा अमेरिकी राजनीतिको समीकरणमा ठुलो फेरबदल ल्याउने निश्चितप्रायः देखिन्छ।