इजरायली संसदीय निर्वाचन : ९० प्रतिशत मतगणना हुँदा नेतान्याहु गठबन्धन पछाडि, विपक्षी दलहरूबीच सरकार गठनमा चुनौती

काठमाडौँ, कात्तिक १२ गते । इजरायलको संसदीय निर्वाचनमा करिब ९० प्रतिशत मतको गणना हुँदा प्रधानमन्त्री बेन्जामिन नेतान्याहुको गठबन्धनले ५३ सिटमा सिमित भएको छ।

‘द टाइम्स अफ इजरायल’ का अनुसार विपक्षी दलहरूले कुल ६७ सिट हासिल गरे पनि उनीहरूबीचको राजनीतिक विभाजन र वैचारिक भिन्नताका कारण सरकार गठनको प्रक्रिया निकै चुनौतीपूर्ण बनेको छ। विपक्षी खेमामा यहुदी नेतृत्वका दलहरूले ४८ र अरब नेतृत्वका दलहरूले १९ सिट प्राप्त गरेका छन्। यद्यपि, यहुदी नेतृत्वका अधिकांश विपक्षी दलहरू अरब नेतृत्वका दलसँग सहकार्य गर्न अनिच्छुक देखिएका छन्। निर्वाचन अधिकारीहरूका अनुसार सैनिकसहितका मतदाताहरूको बाँकी मतगणनाले अन्तिम परिणाममा केही फेरबदल ल्याउन सक्ने सम्भावना अझै बाँकी छ।

विपक्षी नेता गदी आइसेनकोटले आएको निर्वाचन परिणामले वर्तमान नेतान्याहु सरकारप्रति जनताको ठुलो अविश्वास रहेको स्पष्ट पारेका छन्। उनले देशमा राजनीतिक परिवर्तन र अनिवार्य सैनिक सेवाप्रतिको प्रतिबद्धतासहितको नयाँ सरकार गठनका लागि आवश्यक प्रयास गर्ने दृढता व्यक्त गरेका छन्।

यसैबीच, डेमोक्रेट्सका अध्यक्ष यायर गोलनले सरकार गठनका लागि अन्य विपक्षी दलका नेताहरूसँग औपचारिक वार्ता अघि बढाउने घोषणा गर्नुभएको छ। उहाँले स्थिर सरकारका लागि अरब दलहरूलाई समेत गठबन्धनमा समेट्नुपर्ने धारणा राख्दै विवादास्पद न्यायिक सुधारका एजेन्डा रोक्न र युवा पुस्तामा भविष्यप्रतिको आशा जगाउन नयाँ सरकार अपरिहार्य रहेकोमा जोड दिनुभएको छ।

इजरायली राजनीतिमा देखिएको यो कसिलो र विभाजित जनादेशले आगामी दिनमा सरकार गठनको प्रक्रियालाई थप रोचक र पेचिलो बनाउने देखिन्छ। नेतान्याहुको लामो कार्यकाललाई चुनौती दिँदै विपक्षी दलहरूले विकल्प खोज्ने प्रयास गरे पनि आपसी गठबन्धनको समीकरण मिलाउनु उनीहरूको मुख्य परीक्षा बनेको छ। अन्तिम नतिजा सार्वजनिक भएपछि मात्र इजरायलको राजनीतिक भविष्य र नयाँ सरकारको रूपरेखा स्पष्ट हुनेछ।