मलेसिया रोजगारी विवाद समाधानका लागि कूटनीतिक संवाद तीव्र : भ्रमपूर्ण सूचनाको पछि नलाग्न मन्त्रालयको आग्रह

काठमाडौँ, कात्तिक ११ गते । श्रम, रोजगार तथा सामाजिक सुरक्षा मन्त्रालयले नेपाल र मलेसियाबीच श्रमिक छनोट तथा भर्ना प्रक्रियामा देखिएका विवादहरूलाई आपसी कूटनीतिक संवादमार्फत यथाशीघ्र टुंग्याउने पक्षमा सरकार दृढ रहेको जनाएको छ।

मलेसिया जाने कामदारहरूको स्वास्थ्य परीक्षण गत असोज १५ देखि रोकिएसँगै भिसा प्रक्रिया पनि अवरुद्ध बनेको अवस्थामा मन्त्रालयले यस विषयमा गम्भीर ध्यानाकर्षण भएको बताएको छ। विभिन्न सञ्चारमाध्यम तथा सामाजिक सञ्जालमा मलेसिया रोजगारीका सम्बन्धमा छरिएका भ्रमपूर्ण, भ्रामक र तथ्यहीन सूचनाहरूको पछि नलाग्नसमेत सरकारले सबैमा आग्रह गरेको छ।

मन्त्रालयद्वारा जारी विज्ञप्तिमा नेपालको श्रम नीति, वैदेशिक रोजगार ऐन तथा नियमावली, द्विपक्षीय सन्धि–सम्झौता र अन्तर्राष्ट्रिय कानुनको परिधिभित्रै रहेर सम्पूर्ण कामहरू भइरहेको उल्लेख गरिएको छ। संविधान र प्रचलित कानुन विपरीतका कुनै पनि प्रणालीले नेपाली श्रमिकको दीर्घकालीन हितको रक्षा गर्न नसक्ने स्पष्ट पार्दै मन्त्रालयले नेपाल र मलेसियाबीचको श्रम आप्रवासनलाई व्यवस्थित, पारदर्शी, वस्तुनिष्ठ, न्यायोचित र पारस्परिक हितमा आधारित बनाउन सरकार पूर्ण रूपमा सचेत र क्रियाशील रहेको जनाएको छ।

दुई देशबीचको श्रम समझदारी र कानुनका आधारमा पारदर्शी, निष्पक्ष तथा दुवै सरकारलाई मान्य हुने खालको कामदार छनोट तथा भर्ना प्रणालीको विकास गर्न नेपाल सरकार सकारात्मक रहेको छ। मलेसियाली पक्षसँग निरन्तर भइरहेको संवादले छिट्टै सकारात्मक निष्कर्ष निकाल्ने र रोकिएका प्रक्रियाहरू सुचारु हुने विश्वास लिइएको छ। सरकारले वैदेशिक रोजगारीलाई सुरक्षित, मर्यादित र व्यवस्थित बनाउन कुनै पनि कसर बाँकी नराख्ने प्रतिबद्धता समेत व्यक्त गरेको छ।