यस वर्षको तिहारमा ५२ लाख माला खपत हुने अनुमान : ४८ करोडको कारोबार हुने, ८९ प्रतिशत स्वदेशी उत्पादन

काठमाडौँ, कात्तिक ११ गते । यस पटकको तिहार पर्वमा मुलुकभर झन्डै ५२ लाख गोटा फूलका माला खपत हुने अनुमान गरिएको छ। फ्लोरिकल्चर एसोसिएसन नेपाल (फ्यान) का अनुसार यस वर्षको तिहारमा सयपत्री, मखमली र गोदावरी गरी कुल ५१ लाख ८० हजार गोटा माला खपत हुँदा करिब ४८ करोड रुपियाँ बराबरको कारोबार हुनेछ।

गत वर्षको तुलनामा यसपटक सयपत्री मालाको माग करिब पाँच लाखले बढेको छ। कुल खपत हुने मालामध्ये सबैभन्दा धेरै ४५ लाख गोटा सयपत्री, ६ लाख मखमली, २० हजार गोदावरी र ६० हजार मिक्स माला खपत हुनेछन्।

तिहारमा माग हुने मालामध्ये ८९ प्रतिशत हिस्सा स्वदेशी उत्पादनले ओगटेको छ। फ्यानका अध्यक्ष राजेशभक्त श्रेष्ठका अनुसार वार्षिक रूपमा १० देखि १५ प्रतिशतले पुष्पको माग बढ्दै गएको छ।

सरकारले पछिल्लो तीन वर्षदेखि सयपत्री फूलको आयातमा प्रतिबन्ध लगाएपछि स्वदेशी किसानहरूको उत्पादनले राम्रो बजार पाउन थालेको छ। हाल मुलुकका ५४ जिल्लामा ३२५ हेक्टर क्षेत्रफलमा पुष्प खेती भइरहेको छ भने यस क्षेत्रमा ११ अर्ब ५० करोड रुपियाँभन्दा बढी लगानी भई ६२ हजारभन्दा बढीले रोजगारी प्राप्त गरेका छन्।

व्यावसायिक खेती विस्तार हुँदै गए पनि आन्तरिक माग पूर्ण रूपमा धान्न अझै केही समय लाग्ने देखिएको छ। भन्सार विभागको तथ्याङ्क अनुसार पुष्प व्यवसायमा आयात अझै उच्च रहेको छ भने नेपालबाट बेलायत, अमेरिका र अस्ट्रेलियाजस्ता देशहरूमा दुई लाखभन्दा बढी सयपत्री माला निर्यातसमेत हुने गरेको छ। ग्रामीण तथा सहरी क्षेत्रमा तिहारको सजावट र भाइटीकाका लागि स्थानीय उत्पादनले ठुलो राहत पुर्‍याएको छ।