इजरायलको केयरगिभर रोजगारी : महिलाको मागभन्दा कम र पुरुषको तीन गुणा बढी आवेदन

काठमाडौँ, कात्तिक १० गते । इजरायलमा नेपाली सहायक श्रमिक (केयरगिभर) का रूपमा काम गर्नका लागि इजरायल सरकारले गरेको मागमा महिलाहरूको उत्साहजनक सहभागिता देखिएको छैन।

वैदेशिक रोजगार विभागका अनुसार इजरायलले महिला केयरगिभरका लागि १ हजार १३२ जनाको माग गरेकामा जम्मा ६९० जना (मागको ६१ प्रतिशत) मात्रै आवेदन दिएका छन्। यसको विपरीत पुरुषतर्फ भने ३३२ जनाको माग रहेकोमा मागको तीन गुणाभन्दा बढी अर्थात् १ हजार १४५ जनाको आवेदन परेको विभागले जनाएको छ। गत असोज पहिलो साता विभागले कुल १ हजार ४६४ जनाका लागि आवेदन खुलाएको थियो।

विभागका अनुसार खुलाइएको विज्ञापनमा करिब १६ हजारको आवेदन परे पनि आवश्यक प्रक्रिया पूरा गर्ने आवेदकहरूको सङ्ख्या १ हजार ८३५ मात्र रहेको थियो। तीमध्ये इजरायल रोजगारीका लागि अनिवार्य मानिएको ‘अफ स्किल’ अङ्ग्रेजी भाषा परीक्षा १ हजार ६८७ जनाले उत्तीर्ण गरेका छन्। विभागका इजरायल शाखा प्रमुख गगन विष्टले पुरुषतर्फ उच्च आकर्षण देखिए पनि महिलातर्फ माग धान्ने गरी आवेदन नआएको विषयमा नेपालस्थित इजरायली दूतावासमार्फत इजरायललाई जानकारी गराइसकेको बताएका छन्। भाषा परीक्षा उत्तीर्ण गर्ने र आवेदन प्रक्रिया पूरा गर्ने चरणहरू भिन्न भएका कारण परीक्षा पास गरेका सबैले आवेदन नदिएको हुन सक्ने अनुमान गरिएको छ।

विभागले हाल प्राप्त भएका आवेदनहरूको विवरण परीक्षण तथा प्रमाणीकरणको काम गरिरहेको छ र यो प्रक्रिया पूरा हुनासाथ योग्य उम्मेदवारहरूको नामावली सार्वजनिक गरिने जनाएको छ। विगतमा नेपाली महिलाहरूका लागि इजरायलको केयरगिभर रोजगारी सुरक्षित र आकर्षक आम्दानीको गतिलो माध्यम मानिने गरे पनि पछिल्लो समय इजरायल र इरानबीचको युद्ध तथा त्यसले सिर्जना गरेको सुरक्षा जोखिमका कारण महिलाहरू त्यसतर्फ जान निरुत्साहित भएको विभागको बुझाइ छ।