एनपीएल : लुम्बिनी लायन्सको सानदार सुरुआत, सुदूरपश्चिमलाई ७ विकेटले हरायो

काठमाडौँ, कात्तिक ९ गते । किशोर महतो र शेर मल्लको उत्कृष्ट बलिङ तथा डी’आरसी सर्ट र आसिफ शेखले गरेको आक्रामक ब्याटिङको मद्दतमा च्याम्पियन लुम्बिनी लायन्सले नेपाल प्रिमियर लिग (एनपीएल) क्रिकेटको तेस्रो संस्करणमा आफ्नो उपाधि बचाउने अभियान शानदार रूपमा सुरु गरेको छ। प्रतियोगिताको पहिलो दिन सोमबार भएको उद्घाटन खेलमा लुम्बिनीले सुदूरपश्चिम रोयल्सलाई ७ विकेटले पराजित गर्‍यो।

कीर्तिपुरस्थित त्रिभुवन अन्तर्राष्ट्रिय क्रिकेट मैदानमा भएको खेलमा सुदूरपश्चिमले दिएको ८८ रनको सामान्य लक्ष्य लुम्बिनीले मात्र ९.५ ओभरमै ३ विकेट गुमाएर पूरा गर्‍यो। यसअघि टस जितेर पहिले फिल्डिङ रोजेको लुम्बिनीका लागि बलरहरूले उत्कृष्ट प्रदर्शन गर्दै सुदूरपश्चिमलाई १७.२ ओभरमा ८७ रनमै अलआउट गरेका थिए।

लक्ष्य पछ्याउने क्रममा लुम्बिनीका डी’आरसी सर्टले १८ बलमा ४ चौका र ३ छक्का प्रहार गर्दै ४० रन बनाए भने जनकपुर बोल्ट्स छाडेर यसपटक लुम्बिनीबाट खेलिरहेका आसिफ शेखले २५ बलमा ३२ रन जोडे। पहिलो विकेटका लागि उनीहरूले आक्रामक साझेदारी गर्दै ५ ओभरमै टोलीको स्कोर ५० रन पार गराएका थिए। सुदूरपश्चिमका बलर अनिल खरेलले २ विकेट लिए पनि जितका लागि त्यो पर्याप्त भएन।

यसअघि बलिङतर्फ लुम्बिनीका किशोर महतोले ४ ओभरमा २८ रन खर्चेर ४ विकेट लिए भने अफ स्पिनर शेर मल्लले ४ ओभरमा ११ रनमात्र दिएर ३ विकेट हात पारे। सुदूरपश्चिमका लागि दीपेन्द्रसिंह ऐरीले सर्वाधिक २७ रन बनाए पनि अन्य ब्याटरहरूले क्रिजमा टिकेर खेल्न सकेनन्। गत वर्षको फाइनलमा पनि लुम्बिनीले सुदूरपश्चिमलाई पराजित गर्दै उपाधि जितेको थियो।