विराटनगर किंग्सद्वारा आधिकारिक मोबाइल एपको बेटा संस्करण सार्वजनिक, समर्थकहरूले विभिन्न सुविधा पाउनुका साथै पुरस्कार जित्ने अवसर

काठमाडौँ, कात्तिक ८ गते । नेपाल प्रिमियर लिग (एनपिएल) को फ्रेन्चाइज टोली विराटनगर किंग्सले आफ्ना समर्थकहरूलाई डिजिटल माध्यमबाट टोलीसँग नजिकबाट जोड्ने उद्देश्यले आधिकारिक मोबाइल एपको बेटा संस्करण सार्वजनिक गरेको छ।

हाल एन्ड्रोइड प्रयोगकर्ताहरूका लागि गुगल प्ले स्टोरमा उपलब्ध गराइएको यो एपमार्फत खेलको लाइभ अपडेट, नतिजाको अनुमान, विभिन्न प्रतियोगिता, रिवार्ड प्वाइन्ट तथा टोलीका आधिकारिक जर्सी र सामग्रीहरू खरिद गर्न सकिने सुविधा दिइएको छ। आईओएस प्रयोगकर्ताहरूका लागि पनि यो एप छिट्टै सार्वजनिक गरिने टोलीले जनाएको छ।

एपमा राखिएको ‘म्याचडे सेन्टर’ मार्फत खेल तालिका, नतिजा र प्रमुख गतिविधिको जानकारी लिन सकिन्छ भने ‘फ्यान जोन’ बाट समर्थकहरूले आफ्ना प्रतिक्रिया, तस्बिर र सन्देशहरू आदान-प्रदान गर्दै एउटै डिजिटल समुदायमा जोडिन सक्नेछन्।

यस बाहेक, एपमा रहेको ‘प्रेडिक्ट एन्ड विन’ सुविधा, क्रिकेटसम्बन्धी मिनी गेम र दैनिक १० हजार पाइला हिँड्ने लक्ष्य पूरा गरेर फ्यान प्वाइन्ट कमाउन सकिने ‘डेली स्टेप च्यालेन्ज’ जस्ता आकर्षक विशेषताहरू समेटिएका छन्। संकलित प्वाइन्टका आधारमा समर्थकहरू ब्रन्ज, सिल्भर, गोल्ड र प्लाटिनम गरी चार तहमा उक्लिने र सोही अनुरूप विशेष पुरस्कारहरू प्राप्त गर्नेछन्।

एपभित्रै रहेको अनलाइन स्टोरबाट समर्थकहरूले आफ्नो नाम र मनपरेको नम्बर राखेर विराटनगर किंग्सका आधिकारिक जर्सीहरू व्यक्तिगत स्वरूपमा खरिद गर्न सक्नेछन्। जर्सीको भुक्तानीका लागि क्यास अन डेलिभरी र डिजिटल माध्यमको सुविधा छ भने अर्डरको स्थिति पनि एपबाटै ट्र्याक गर्न मिल्छ।

बेटा संस्करण सार्वजनिक गरेको अवसरमा टोलीले ‘भेरिफाइड फ्यान’ कार्यक्रम मार्फत सयौँ प्रयोगकर्तालाई जर्सी र खानाका भौचरहरू उपलब्ध गराउने योजना पनि सार्वजनिक गरेको छ।