नेकपाको भोलिदेखि ‘राष्ट्रिय जागरण अभियान’ सञ्चालन : पेरिसडाँडाबाट उद्घाटन हुने

काठमाडौँ, कात्तिक ६ गते । सरकारको कार्यशैलीलाई लिएर लगातार विरोध जनाउँदै आएको नेपाली कम्युनिस्ट पार्टी (नेकपा) ले पूर्वनिर्धारित कार्ययोजना अनुसार भोलिदेखि देशव्यापी ‘राष्ट्रिय जागरण अभियान’ सञ्चालन गर्ने भएको छ।

भोलिदेखि मङ्सिर २५ गतेसम्म सञ्चालन हुने यस अभियानको पहिलो दिन काठमाडौंमा एक विशेष कार्यक्रमबीच औपचारिक उद्घाटन गरिनेछ। पार्टीका संयोजक पुष्पकमल दाहाल र सहसंयोजक माधवकुमार नेपालले संयुक्त रूपमा काठमाडौंको पेरिसडाँडास्थित केन्द्रीय पार्टी कार्यालयबाट यस अभियानको उद्घाटन गर्ने कार्यक्रम तय भएको छ।

सरकारविरुद्ध जनमत तयार पार्ने र पार्टीको सङ्गठन सुदृढ गर्ने उद्देश्यले ल्याइएको यस जागरण अभियानको समापनपछि पार्टीले अन्य महत्त्वपूर्ण सांगठनिक अधिवेशनहरूको समेत तयारी गरेको छ। नेकपाले आगामी पुस ११ गते देशभरका सम्पूर्ण वडास्तरमा र माघ १५ गते पालिकाहरूमा एकैसाथ पालिकास्तरीय अधिवेशन सम्पन्न गर्ने कार्ययोजना बनाएको छ। स्थानीय तहको तल्लो तहको अधिवेशन सम्पन्न भएलगत्तै क्रमशः जिल्ला, प्रदेश र राष्ट्रिय महाधिवेशन आयोजना गरिने पार्टीका नेताहरूले जनाएका छन्।

तत्कालीन नेकपा (माओवादी केन्द्र) र नेकपा (एकीकृत समाजवादी) बीच एकता भई नयाँ रूपमा गठन भएपछि नेकपा हाल तदर्थ समितिको भरमा सञ्चालन हुँदै आएको छ। लामो समयदेखि पूर्णता पाउन नसकेको सांगठनिक संरचनालाई यसै अभियान र आगामी अधिवेशनमार्फत पूर्णता दिने पार्टीको मुख्य रणनीति रहेको छ। यस अभियानले तल्लो तहसम्म राजनीतिक गतिशीलता बढाउने र पार्टीको पकड बलियो बनाउने विश्वास लिइएको छ।