हुम्लाको लिमीमा हिमपातले बेपत्ता बनाएका ३०७ पशुधनको सकुशल उद्धार

लिमी, कात्तिक ६ गते । हुम्लाको नाम्खा गाउँपालिका–६, हिमालपारीको गाउँ लिमीस्थित उच्च पाटनमा चरनका लागि छाडिएका बेला भारी हिमपातले बेपत्ता भएका तीन सयभन्दा बढी पशुहरूको सकुशल उद्धार गरिएको छ।

लिमीका वडा अध्यक्ष पाल्जोर तामाङको नेतृत्वमा गएको स्थानीयको टोलीले लाप्चा क्षेत्रको साँक्या खोलामा हिउँमा उभिएका अवस्थामा ती पशुहरूलाई फेला पारेको हो।

गत असोज १० र ११ गते परेको भारी हिमपातपछि ग्याउ खोला र लिङ खोलाका पाटनबाट ती पशुहरू बेपत्ता भएका थिए। स्थानीयवासीले जीवितै भेट्ने आशा मारिसकेको अवस्थामा चारवटा समूहमा बाँडिएर खोजी कार्य अघि बढाइएको थियो। लामो प्रयासपछि लाप्चा क्षेत्रबाट जम्मा ३०७ वटा पशुहरूलाई सकुशल उद्धार गरी सुरक्षित रूपमा तुम्लिङ ल्याइएको छ।

उद्धार गरिएका पशुहरूमा ५० वटा घोडा, २० वटा झोपा र २३७ वटा चौरीगाई रहेका छन्। लामो समयसम्म घाँस खान नपाएका कारण घोडाहरूले आफ्नो पुच्छर आफैँ खाएको अवस्थामा भेटिएका थिए। अझै केही खोजी टोलीहरू क्षेत्रमै खटिएका कारण थप पशुहरू फेला पर्न सक्ने सम्भावना रहेको छ।

घटनास्थल क्षेत्रमा जमेको हिउँ पन्छाउन नाम्खा गाउँपालिकाले ताक्चीदेखि ग्याउ खोलासम्मको सडकमा हिउँ पन्छाउने टेण्डर आह्वान गरेको थियो। सडकको हिउँ हटेसँगै खोज तथा उद्धार कार्य सहज बनेको हो। २७ दिनसम्म आहाराविहीन अवस्थामा पनि पशुहरू जीवितै भेटिएपछि लिमीका स्थानीय बासिन्दाहरू अत्यधिक खुसी भएका छन्।