नेपाली कांग्रेस १५ औँ महाधिवेशन: सम्पूर्ण पदको मतगणना सम्पन्न, दसैँलगत्तै शपथग्रहण र प्रमाणपत्र वितरण

काठमाडौँ, असोज ३० गते । नेपाली कांग्रेसको १५ औँ महाधिवेशनअन्तर्गत नयाँ नेतृत्व चयनका लागि भएको सम्पूर्ण पदको मतगणना शुक्रबार बिहान सम्पन्न भएको छ।

मधेश प्रदेश र बागमती प्रदेशको अन्तिम परिणाम सार्वजनिक भएलगत्तै गत असोज २३ गते रातिदेखि थालिएको मतगणनाको सम्पूर्ण कार्य सकिएको निर्वाचन समितिका सदस्य सचिव राजु कटुवालले जानकारी दिनुभएको छ।

लुम्बिनी प्रदेश, गण्डकी प्रदेश, उपत्यका, श्रमिक, सहिद परिवार तथा द्वन्द्वपीडितको प्रतिनिधित्व गर्ने केन्द्रीय सदस्यहरूसँगै सहमहामन्त्री, खुला, महिला, खस आर्य र थारू तर्फका केन्द्रीय सदस्यहरूको मतपरिणाम रुजु गर्ने कार्य भइरहेको छ। केही समयमै आधिकारिक रूपमा सम्पूर्ण नतिजा सार्वजनिक गर्ने तयारी गरिएको छ।

१४औँ महाधिवेशनमा ७ हजार ७ सय मतदाताको मतगणना गर्न १२ दिन लागेको भए पनि यसपटक २५ वटासम्म समूह बनाएर दिन–रात काम गरिएका कारण ७ हजार ३९२ मतदाताको मतपरिणाम एक सातामै सम्पन्न भएको निर्वाचन समितिले जनाएको छ।

यसपटक कुल २२९ पदका लागि ७७ प्रकारका पदहरूमा मतदान भएको थियो, जसमा मतदाताहरूले २३ वटा मतपत्रमा भोट हाल्नुपर्ने व्यवस्था अनुसार करिब १ लाख ६२ हजार मतपत्र गणना गरिएको थियो। कुनै पनि विवादबिना सौहार्दपूर्ण तरिकाले निर्वाचन सम्पन्न भएको समितिले जनाएको छ।

नतिजा सार्वजनिक भएपश्चात् दसैँलगत्तै नवनिर्वाचित पदाधिकारी तथा सदस्यहरूलाई प्रमाणपत्र वितरण, शपथग्रहण र कार्यसमितिको पहिलो बैठक बस्ने तयारी गरिएको छ।