चलचित्र ‘पाँच पाण्डव’ को पहिलो ट्रेलर सार्वजनिक: कात्तिक २० गते तिहारमा प्रदर्शन हुने

काठमाडौँ, असोज ३० गते । बहुप्रतीक्षित नेपाली चलचित्र ‘पाँच पाण्डव’ को पहिलो ट्रेलर सार्वजनिक गरिएको छ।

निर्माण पक्षले एक कार्यक्रमबीच चलचित्रको पहिलो ट्रेलर सार्वजनिक गरेको हो, जसले फिल्मको मुख्य कथाको झल्को दिए पनि रहस्य भने कायम राखेको छ। ट्रेलरमा युधिष्टिरको भूमिकामा देखिएका अभिनेताले आफू स्वर्गबाट आएको बताउँदै भीम, अर्जुन, नहकुल र सहदेवको खोजीमा भौंतारिएका दृश्यहरू समेटिएका छन्।

वसन्त निरौलाको निर्देशनमा तयार भएको यो मल्टिस्टारर चलचित्र आगामी तिहारको अवसर पारेर आगामी कात्तिक २० गतेदेखि देशव्यापी रूपमा प्रदर्शनमा आउनेछ। काली रानी फिल्मस्को ब्यानरमा निर्माण भएको यस चलचित्रका प्रस्तुतकर्ता नवीन श्रेष्ठ हुन् भने निर्माता काली रानी श्रेष्ठ रहेकी छिन्।

चलचित्रमा हरिवंश आचार्य (युधिष्टिर), जितु नेपाल (भीम), आर्यन सिग्देल (अर्जुन), महेश त्रिपाठी (नहकुल), सुशील सिटौला (सहदेव) र इभा गिरी (द्रोपदी) लगायतका कलाकारहरूको मुख्य अभिनय रहेको छ।

चलचित्रमा उनीहरूका साथै दीपाश्री निरौला, सरिता गिरी, विनोद न्यौपाने, प्रशान्त ताम्राकार र रितेश पौडेल लगायतका कलाकारहरू पनि यसमा देखिएका छन्। चलचित्रको कथा, पटकथा तथा संवाद सुशीलले लेखेका हुन् भने यसको देशव्यापी वितरणको जिम्मा आरआर फिल्मस (रोहित कट्टेल र रत्न श्रेष्ठ) ले लिएको छ।