‘पेन्सनपट्टा’ चलचित्र समीक्षा: लाहुरे परिवारको कथा र रैथाने संस्कृतिको दस्ताबेज

काठमाडौँ, असोज ३ गते । पूर्वभारतीय सैनिकको निधनपछि पेन्सनपट्टामा देखिएको नामको त्रुटि र त्यसले निम्त्याएको पारिवारिक सङ्कटमा आधारित चलचित्र ‘पेन्सनपट्टा’ ले दर्शकको ध्यान खिचेको छ।

निर्देशक माओत्से गुरुङद्वारा निर्देशित यस चलचित्रले भूपू लाहुरे परिवारले भोग्नुपरेको कानुनी तथा आर्थिक सास्तीका साथै बहुविवाह र पारिवारिक विखण्डनको यथार्थलाई जीवन्त रूपमा पर्दामा उतारेको छ।

गङ्गाबहादुरको निधनपछि कान्छी श्रीमती छलमाया र छोरा राजन (दयाहाङ राई) पेन्सन क्याम्प पुग्दा रेकर्ड फाइलमा जेठीको नाम भेटिएपछि मुख्य कथा सुरु हुन्छ। पेन्सनको अधिकारका लागि जेठीआमा खोज्न निस्किएका राजनको यात्रा, त्यस क्रममा आइपर्ने जटिलता र पारिवारिक सङ्घर्षलाई चलचित्रले मुख्य द्वन्द्व बनाएको छ।

साथै, निर्देशक गुरुङले गुरुङ समुदायको रोधी, ‘पछ्यौराले बाटो छेक्ने’ परम्परा तथा ‘धागो बाँध्ने’ संस्कार जस्ता रैथाने सांस्कृतिक पक्षहरूलाई कलात्मक ढङ्गले समेट्नुभएको छ।

अभिनयका हिसाबले दयाहाङ राई, गौमाया गुरुङ, विल्सनविक्रम राई, पशुपति राई, बुद्धि तामाङ र स्वर्गीय सुनील थापा लगायतका कलाकारको प्रस्तुति सशक्त रहेको छ।

विशेष गरी चलचित्रको गीत ‘जुनी जाला’ले दर्शकमा बेग्लै उत्साह थपेको छ। सिनेम्याटोग्राफी र केही दृश्यमा लिपसिङ जस्ता प्राविधिक त्रुटिहरू भए तापनि नयाँ पुस्ताका लागि यो चलचित्र आफ्ना मौलिक संस्कृति र लाहुरे जीवनको यथार्थ बुझ्ने महत्त्वपूर्ण माध्यम बनेको छ।

‘पेन्सनपट्टा’ चलचित्रको मुख्य पक्षहरू