चलचित्र ‘सारथी’ को दोस्रो पोस्टर सार्वजनिक : म्याग्दीको गुर्जा गाउँको जन-जीवन झल्किने लुक्समा देखियो टिम

काठमाडौँ, कात्तिक २८ गते । कुमार गजुरेलको निर्देशनमा तयार भएको प्रतीक्षित नेपाली चलचित्र ‘सारथी’ को दोस्रो पोस्टर सार्वजनिक गरिएको छ।

निर्माण टिमले चलचित्रका मुख्य कलाकारहरूको चारित्रिक लुक्ससहितको नयाँ पोस्टर सार्वजनिक गर्दै फिल्मको कथावस्तुबारे थप झाँकी प्रस्तुत गरेको हो। सार्वजनिक पोस्टरमा हिमाली भेगको अनुपम प्राकृतिक सौन्दर्यसँगै त्यहाँको जनजीवन, कठिन संघर्ष र पात्रहरूको भावভङ्गी स्पष्ट रूपमा झल्काइएको छ।

‘द हिडन भिलेज गुर्जा’ उप-शीर्षक दिइएको यस पोस्टरबाट म्याग्दीको रमणीय गुर्जा गाउँको परिवेशलाई ठुलो पर्दामा उतारिएको प्रष्ट हुन्छ। ग्रामीण जीवन, स्थानीय संस्कृति र भौगोलिक परिवेशलाई उच्च प्राथमिकतामा राखेर निर्माण गरिएको यस चलचित्रको सम्पूर्ण छायाङ्कन म्याग्दीको गुर्जा क्षेत्रमै गरिएको हो। किम्भे प्रोडक्सन र धीरज फिल्म इन्फिनिटीको ब्यानरमा बनेको यस चलचित्रमा निरता सिंह, उत्तम प्रधान, मुकुन्द श्रेष्ठ, राजेन्द्र केसी, सम्रान्त थापा लगायत थुप्रै कलाकारहरूको बलियो अभिनय रहनेछ।

चलचित्रका निर्देशक कुमार गजुरेलले नै यसको कथा, पटकथा तथा संवाद तयार पार्नुभएको हो भने तारा थापा ‘किम्भे’ यसका प्रस्तुतकर्ता तथा सम्पादक हुन्। रदिप श्रेष्ठ र प्रदीप रायमाझी निर्माता रहेको यस फिल्ममा कार्यकारी निर्माताको रूपमा बेक बहादुर विश्वकर्मा र नवीन श्रेष्ठ रहनुभएको छ।

त्यस्तै, सङ्कल्प भुजेलको छायाङ्कन, बाबुल गिरी र प्रशान्त शिवाकोटीको सङ्गीत रहेको सिनेमालाई आरआर फिल्म्सले वितरण गर्ने जिम्मेवारी लिएको छ।

ग्रामीण परिवेश र यथार्थपरक कथामा आधारित यो सिनेमा आगामी मङ्सिर ११ गतेबाट देशव्यापी रूपमा प्रदर्शनमा आउनेछ।