कोप–३१ मा शेर्पा पोसाक लगाएर प्रस्तुत भइन मन्त्री गीता चौधरी : पोसाक लगाउँदा मुजा उल्टो पर्दा पनि शेर्पा समुदायका अगुवाद्वारा सकारात्मक रूपमा लिन आग्रह

काठमाडौँ, कात्तिक २८ गते । कृषि, वन तथा पर्यावरणमन्त्री गीता चौधरीले जलवायु परिवर्तनसम्बन्धी संयुक्त राष्ट्रसंघीय सम्मेलन (कोप–३१) को पहिलो सत्रमा हिमाली क्षेत्रका समुदायको समस्या अन्तर्राष्ट्रिय मञ्चमा उजागर गर्न सांकेतिक रूपमा शेर्पा समुदायको परम्परागत पोसाक ‘बख्खु’ लगाएर प्रस्तुत हुनुभएको छ।

तराईको थारू समुदायमा जन्मिनुभएकी मन्त्री चौधरीले हिमाली क्षेत्रका दिदी-बहिनीहरूको प्रतिनिधित्व गर्दै उक्त पोसाक लगाउँदा केही प्राविधिक त्रुटि भई बख्खुको मुजा अगाडिको पछाडि पर्न गएको थियो। शेर्पा समुदायका अगुवाहरूको सल्लाह र सुझाव अनुसार नै आफूले ड्रेस लगाएको र सबैले ‘ठीक छ‘ भनेपछि कार्यक्रममा उपस्थित भएको उहाँको सचिवालयले जनाएको छ।

पोसाक लगाउने क्रममा सामान्य त्रुटि भई मुजा उल्टो परेको विषयलाई लिएर सामाजिक सञ्जालमा विभिन्न टीका-टिप्पणी भए पनि शेर्पा समुदायका अगुवाहरूले भने यसलाई सकारात्मक रूपमा लिनुपर्ने बताएका छन्। शेर्पा अगुवा आङ छिरिङ शेर्पाले तराईकी चेलीले हिमालको पोसाक लगाएर अन्तर्राष्ट्रिय मञ्चमा देशको प्रतिनिधित्व गर्नु नै गर्वको विषय भएको र यसले विश्व समुदायसामु शेर्पा समुदायको पहिचान र संस्कृतिलाई थप चिनाएको सामाजिक सञ्जालमार्फत प्रस्ट पार्नुभएको छ।

त्यसैगरी, पत्रकार तथा शेर्पा समुदायका अगुवा छेटु शेर्पाले पनि बख्खुको मुजा अगाडि पछाडि पर्नु सामान्य मानवीय त्रुटि भएको र यसलाई अनावश्यक रूपमा इस्यू बनाउनु उचित नहुने धारणा राख्नुभएको छ।

आफ्नै विशिष्ट थारू संस्कृति हुँदाहुँदै पनि हिमाली महिलाहरूको पीडა र प्रतिनिधित्वलाई सम्मान गर्दै मन्त्री चौधरीले अन्तर्राष्ट्रिय मञ्चमा शेर्पा पोसाक लगाएकोमा उल्टै उहाँलाई धन्यवाद दिनुपर्ने तर्क उहाँको छ। जलवायु परिवर्तनका कारण गम्भीर असर भोगिरहेका हिमाली क्षेत्रका बासिन्दाहरूको मुद्दा विश्वसामु लैजाने उद्देश्यले गरिएको यो प्रयासले सकारात्मक सन्देश प्रवाह गरेको छ।

नोभेम्बर २० तारेखसम्म चल्ने कोप–३१ सम्मेलनमा मन्त्री चौधरीले नेपाल सरकारको तर्फबाट सक्रिय रूपमा सहभागिता जनाउँदै पर्वतीय क्षेत्रका मुद्दाहरूलाई दृढतापूर्वक उठाइरहनुभएको छ।