कोप–३१ को साइडलाइनमा मन्त्री गीता चौधरी र चिनियाँ वातावरणमन्त्री ह्वाङ रुनछ्युबिच द्विपक्षीय भेटवार्ता : हिमालय जलवायु उत्थानशीलता संयन्त्रमा सहयोगको अपेक्षा

काठमाडौँ, कात्तिक २७ गते । कृषि, वन तथा पर्यावरणमन्त्री गीता चौधरी र चीनका पारिस्थितिकी तथा वातावरणमन्त्री ह्वाङ रुनछ्युबिच द्विपक्षीय भेटवार्ता सम्पन्न भएको छ।

जलवायु परिवर्तनसम्बन्धी संयुक्त राष्ट्रसङ्घीय महासन्धिका पक्ष राष्ट्रहरूको ३१ औँ सम्मेलन (कोप–३१) को अवसरमा बिहीबार भएको यस उच्चस्तरीय भेटवार्तामा दुई देशबीचको पर्यावरणीय सहकार्य र जलवायुजन्य जोखिम न्यूनीकरणका विषयमा गहन छलफल भएको थियो।

भेटका क्रममा मन्त्री चौधरीले प्रस्तावित ‘हिमालय जलवायु उत्थानशीलता संयन्त्र‘ स्थापनाका लागि नेपालले उत्तरी छिमेकी चीनबाट विशेष सहयोग र बलियो समर्थनको अपेक्षा गरेको प्रस्ट पार्नुभएको छ।

जलवायु परिवर्तनका कारण विशेष गरी हिमाली क्षेत्रमा दिनप्रतिदिन बढ्दै गएको गम्भीर जोखिम साझा सीमापार चुनौती भएकाले यसको सामना गर्न क्षेत्रीय सहकार्य अपरिहार्य रहेको मन्त्री चौधरीले औँल्याउनुभयो।

गत अगस्ट २६ मा रसुवा–भोटेकोसी क्षेत्रमा आएको प्राकृतिक विपद्पश्चात चीन सरकारले पुर्‍याएको महत्त्वपूर्ण सहयोग तथा माथिल्लो तटीय क्षेत्रको मौसम, हिमनदी र हिमतालको जोखिमसम्बन्धी नियमित सूचना आदान–प्रदान भइरहेकोप्रति उहाँले चीन सरकारप्रति हार्दिक आभार व्यक्त गर्नुभयो।

सम्मेलनमा नेपालको तर्फबाट धारणा राख्दै मन्त्री चौधरीले कोप–३१ को औपचारिक निर्णयहरूमा पर्वतीय क्षेत्रका विशिष्ट मुद्दाहरूलाई उच्च प्राथमिकता दिनुपर्ने माग गर्नुभयो। साथै, पृथ्वीको तापक्रम वृद्धिलाई १.५ डिग्री सेल्सियसमा सीमित राख्नुपर्ने, र जलवायु परिवर्तनबाट प्रभावित विकासोन्मुख देशहरूका लागि जलवायु अनुकूलन कोष तथा पर्याप्त वित्तको सुनिश्चितता हुनुपर्ने नेपालको अडान दोहोर्याउनुभयो।

चिनियाँ वातावरणमन्त्री ह्वाङ रुनछ्युले नेपालले उठाएका जलवायु तथा वातावरणीय मुद्दाहरूप्रति चासो देखाउँदै द्विपक्षीय सहकार्यलाई थप सुदृढ बनाउने प्रतिबद्धता व्यक्त गर्नुभएको छ। यस प्रकारका उच्चस्तरीय भेटवार्ताले दुई देशबीचको कूटनीतिक सम्बन्धका साथै पर्यावरणीय साझेदारीलाई अझ उचाइमा पुर्‍याउने विश्वास लिइएको छ।