गृहमन्त्री सुधन गुरुङ विश्व प्रहरी शिखर सम्मेलनमा सहभागी हुन यूएई प्रस्थान : सुरक्षा प्रविधि र सहकार्यबारे छलफल हुने

काठमाडौँ, कात्तिक २७ गते । गृहमन्त्री सुधन गुरुङ विश्व प्रहरी शिखर सम्मेलनमा सहभागी हुनुका लागि शुक्रबार साँझ संयुक्त अरब इमिरेट्स (यूएई) तर्फ प्रस्थान गर्नुभएको छ।

यूएई सरकारको औपचारिक निमन्त्रणा स्वीकार गर्दै उहाँ साँझ ७ बजे त्रिभुवन अन्तर्राष्ट्रिय विमानस्थलबाट दुबई प्रस्थान गर्नुभएको हो। दुबईमा आयोजना हुने यस प्रतिष्ठित सम्मेलनमा अन्तर्राष्ट्रिय प्रहरी सहकार्य, सुरक्षा प्रविधिको विकास तथा अत्याधुनिक अपराध नियन्त्रणका नवीनतम अभ्यासहरूका बारेमा गहन छलफल हुने कार्यक्रम रहेको छ।

सम्मेलनका दौरान उच्चस्तरीय नीतिगत छलफल, विषयगत तथा प्राविधिक सत्रहरू, राउन्ड टेबल बैठकहरू, कार्यशाला तथा तालिमहरू, अन्तर्राष्ट्रिय प्रदर्शनी र विश्व प्रहरी पुरस्कार वितरण लगायतका विविध गतिविधिहरू सञ्चालन हुनेछन्।

यस सम्मेलनमा रक्षा तथा सङ्कट प्रतिकार्य, स्वचालित रोबोट, ड्रोन तथा मानवीय क्षमता, कृत्रिम बुद्धिमत्ता (एआई) मा आधारित प्रहरी सेवा, डिजिटल रूपान्तरण, साइबर आक्रमण तथा डिजिटल ठगी नियन्त्रण, क्रिप्टो कारोबार तथा वित्तीय अपराध नियन्त्रण लगायतका १४ वटा महत्त्वपूर्ण विषयगत क्षेत्रहरू समेटिएका छन्।

त्यसैगरी, अपराध अनुसन्धान, गुप्तचर सूचना तथा आधुनिक फरेन्सिक प्रविधि, लागु-औषध तथा सङ्गठित अपराध नियन्त्रण, सीमा सुरक्षा, स्मार्ट सुरक्षा प्रणाली र भू-उपग्रह सूचना तथा अन्तरिक्ष सुरक्षासम्बन्धी विषयहरूमा पनि यहाँ व्यापक मन्थन हुनेछ।

गृह मन्त्रालयका अनुसार यस सम्मेलनमा नेपालको सक्रिय सहभागिताले यूएईसहित विश्वका विभिन्न मुलुकका आन्तरिक मामिला मन्त्री तथा सुरक्षा प्रमुखहरूसँग द्विपक्षीय भेटघाट गर्ने र सुरक्षा क्षेत्रमा प्राविधिक सहयोग आदानप्रदान गर्ने महत्त्वपूर्ण अवसर प्रदान गर्नेछ।

मानव बेच-बिखन, मानव तस्करी, साइबर अपराध र सीमापार सङ्गठित अपराध नियन्त्रणका लागि अन्तर्राष्ट्रिय सहकार्यलाई अझ मजबुत बनाउन तथा नेपाल प्रहरीको आधुनिकीकरण, प्रविधि हस्तान्तरण र विशेषज्ञ तालिमका लागि उपयुक्त साझेदार संस्थाहरूको पहिचान गर्न यो भ्रमण अति उपयोगी हुने विश्वास लिइएको छ।