सुनचाँदीको मूल्यमा भारी गिरावट : सुन प्रतितोला १२,६०० र चाँदी १५५ रुपियाँले घट्यो

काठमाडौँ, कात्तिक २७ गते । स्थानीय बजारमा सुन तथा चाँदीको मूल्यमा उल्लेख्य र भारी गिरावट आएको छ।

नेपाल सुनचाँदी व्यवसायी महासङ्घले सार्वजनिक गरेको तथ्यांक अनुसार शुक्रबार सुनको मूल्य प्रतितोला १२ हजार ६०० रुपियाँले घटेको छ भने चाँदीको मूल्य प्रतितोला १५५ रुपियाँले ओरालो लागेको छ। पछिल्लो समय केही उच्च रेकर्डतर्फ उन्मुख देखिएको बहुमूल्य धातुको बजारमा आएको यो अचानकको गिरावटे उपभोक्ता तथा लगानीकर्ताहरूको ध्यान खिचेको छ।

महासङ्घका अनुसार आज (शुक्रबार) बजारमा छापावाल सुन प्रतितोला दुई लाख ७१ हजार ७०० रुपियाँमा कारोबार भइरहेको छ। त्यसैगरी, चाँदीको मूल्य पनि घटेर प्रतितोला तीन हजार ७०० रुपियाँ कायम हुन पुगेको छ। यसअघि गत कात्तिक २३ गते बजारमा छापावाल सुन प्रतितोला दुई लाख ८४ हजार ३०० रुपियाँ र चाँदी तीन हजार ८५५ रुपियाँसम्म पुगेर कारोबार भएको थियो।

अन्तर्राष्ट्रिय बजारमा देखिएको उतार-चढाव, अमेरिकी डलरको विनिमय दरमा आएको परिवर्तन तथा लगानीकर्ताहरूको सेयर वा अन्य क्षेत्रप्रतिको आकर्षणका कारण स्थानीय बजारमा समेत यसको प्रत्यक्ष प्रभाव परेको विश्लेषकहरूको भनाइ छ। लामो समयदेखि लगातार बढ्दो क्रममा रहेको सुनको मूल्यमा आएको यो करेक्सनले बजारलाई केही हदसम्म सन्तुलनमा ल्याउने अपेक्षा गरिएको छ।

चाडपर्व तथा विवाहको लगन नजिकिँदै गर्दा सुनचाँदीको मूल्यमा आएको यो गिरावटले गरगहना खरीद गर्ने उपभोक्ताहरूलाई केही राहत महसुस गराएको छ। बजारमा देखिएको यो मूल्य उतार-चढावले आगामी दिनमा कारोबारको गतिलाई समेत प्रभावित पार्ने देखिन्छ।