नेपाल आयल निगमद्वारा एलपी ग्यास उद्योगहरूलाई एकआपसमा गाभ्ने (मर्जर) प्रक्रिया सुरु : बजारलाई व्यवस्थित र उपभोक्तामैत्री बनाउने तयारी

काठमाडौँ, कात्तिक १७ गते । नेपाल आयल निगमले एलपी ग्यास उद्योगहरूलाई एक-आपसमा गाभ्ने (मर्जर) प्रक्रिया औपचारिक रूपमा अगाडि बढाएको छ।

चालु आर्थिक वर्ष २०८३/८४ को स्वीकृत नीति तथा कार्यक्रम अनुसार विभिन्न नाम र ब्रान्डमा छरिएर सञ्चालनमा रहेका ग्यास उद्योगलाई एकीकरण गर्न लागिएको निगमले जनाएको छ। हाल मुलुकभर विभिन्न ५९ वटा ग्यास उद्योगहरू सञ्चालनमा रहेका छन्। उद्योग, वाणिज्य तथा आपूर्ति मन्त्री दीपककुमार साहको विशेष पहलमा निगमले गत बिहीबार सबै ग्यास उद्योगहरूलाई पत्राचार गरी मर्जर नीतिलाई प्रोत्साहन गर्न र सोहीअनुरूपको कार्ययोजना पेस गर्न निर्देशन दिइसकेको छ।

बजारमा एउटै ग्यास उद्योगका धेरै ब्रान्डहरू हुँदा उपभोक्ताहरूले सिलिन्डर साटासाट गर्दा अतिरिक्त शुल्क तिर्नुपर्ने बाध्यता रहँदै आएको छ। नेपाल एलपी ग्यास उद्योग सङ्घका अनुसार कोशी, नेपाल र एभरेस्ट ग्यास उद्योगका चार/चार वटा तथा सगर, बाबा र साइबाबा ग्यास उद्योगका दुई/दुई वटा ब्रान्ड सञ्चालनमा छन्। नेपाल एलपी ग्यास उद्योग सङ्घका अध्यक्ष दिवान चन्दले सरकारको यो निर्णय स्वागतयोग्य रहेको बताउँदै उद्योग गाभ्दा लाग्ने करमा बैङ्कहरूलाई जस्तै विशेष छुटको व्यवस्था गर्न सरकारसँग आग्रह गर्नुभएको छ।

यसअघि नै दुई वर्षअघि एचपी र त्रिवेणी ब्रान्डका ग्यास उद्योगहरू मर्ज भइसकेका छन् भने हालै नेपाल ग्यास र एचपी ग्यास तथा राजधानी ग्यास, नेपाल ग्यास र गण्डकी ग्यास उद्योगले पनि मर्जरका लागि निगममा आवेदन दर्ता गराएका छन्। निगमका एलपी ग्यास तथा एभिएसन विभाग प्रमुख एवम् निर्देशक वीनितमणि उपाध्यायले यस प्रक्रियाले ग्यासको बिक्री वितरण प्रणालीलाई थप व्यवस्थित, सहज र उपभोक्तामैत्री बनाउन महत्त्वपूर्ण सहयोग पुग्ने विश्वास व्यक्त गर्नुभएको छ।

ग्यास उद्योगहरूको मर्जर नीतिले बजारमा देखिएका ब्रान्डगत अन्योलता र उपभोक्ताका गुनासाहरूलाई सम्बोधन गर्ने अपेक्षा गरिएको छ। सरकारले यसलाई प्राथमिकतामा राखेर कार्यान्वयन गरेमा समग्र ऊर्जा तथा इन्धन व्यापारमा सकारात्मक सुधार आउने देखिन्छ।