एनपिएल : काठमान्डु गोर्खाजविरुद्ध कर्णाली याक्सले प्रस्तुत गर्‍यो १ सय ८१ रनको लक्ष्य

काठमाडौँ, कात्तिक १६ गते । नेपाल प्रिमियर लिग (एनपिएल) क्रिकेटअन्तर्गत सोमबार भएको खेलमा कर्णाली याक्सले काठमान्डु गोर्खाजसामू जितका लागि १ सय ८१ रनको चुनौतीपूर्ण लक्ष्य प्रस्तुत गरेको छ।

त्रिवि अन्तर्राष्ट्रिय क्रिकेट मैदान कीर्तिपुरमा टस हारेर पहिलो ब्याटिङको निम्तो पाएको कर्णालीले निर्धारित २० ओभरमा ६ विकेट गुमाई १ सय ८० रन बनाउन सफल भयो। लगातार तेस्रो जितको खोजीमा रहेको कर्णालीका लागि ब्याटरहरूले जिम्मेवार प्रदर्शन गर्दै बलियो योगफल तयार गरेका हुन्।

कर्णालीका लागि बंगलादेशी ओपनर आरिफुल इस्लामले उत्कृष्ट ब्याटिङ गर्दै २२ बलमा ५ चौका र ३ छक्का प्रहार गरी सर्वाधिक ४४ रन बनाए। त्यसैगरी, पाकिस्तानी खेलाडी हुसैन तलातले ३० बलमा १ चौका र २ छक्कासहित ४० रनको योगदान दिए भने मार्क वाटले १७ र गुलशन झाले नटआउट २० रन जोडे। मध्यक्रममा पवन सर्राफ र सोमपाल कामी समान १–१ रनमा अविजित रहे। ओपनिङमा आएका जिसन आलम ७ रन र दीपक डुम्रे ८ रनमा आउट भएका थिए।

बलिङतर्फ काठमान्डुका लागि कप्तान करण केसीले ४ ओभरमा ३५ रन खर्चेर सर्वाधिक २ विकेट लिए। त्यस्तै, जहान्दाद खान, शाह आलम, सन्तोष यादव र देव शाहले समान १–१ विकेट हात पारे। हुसैन तलातलाई आउट गर्ने क्रममा जहान्दादले हिट विकेट गराएका थिए।

पहिलो खेलमा जनकपुर बोल्ट्ससँग पराजित भएको काठमान्डु गोर्खाज यो खेलमा आफ्नो पहिलो जित निकाल्ने दबाबसहित मैदानमा उत्रेको छ। बलियो लक्ष्य पछ्याउने क्रममा काठमान्डुको ब्याटिङ प्रदर्शन कस्तो रहनेछ, यसले खेलको नतिजा निर्धारण गर्नेछ।