एनपिएल : विराटनगर किंग्सद्वारा सुदूरपश्चिम रोयल्स ३५ रनले पराजित, सेहन जयसूर्या र एन्ड्रे रसेलको आक्रामक ब्याटिङ

काठमाडौँ, कात्तिक १४ गते । नेपाल प्रिमियर लिग (एनपिएल) क्रिकेटअन्तर्गत शनिबार राति भएको दोस्रो खेलमा विराटनगर किंग्सले सुदूरपश्चिम रोयल्सलाई ३५ रनले पराजित गरेको छ।

त्रि.वि. अन्तर्राष्ट्रिय क्रिकेट मैदानमा लगातारको वर्षाका कारण खेल ढिला गरी राति ९:२० बजे सुरु भएपछि ५ ओभरमा घटाइएको थियो। टस हारेर ब्याटिङको निम्तो पाएको विराटनगरले निर्धारित ५ ओभरमा २ विकेट गुमाउँदै विस्फोटक ब्याटिङ गर्दै १ सय ५ रनको विशाल योगफल तयार गरेको थियो।

इनिङ्सको पहिलो ओभरमै सुदूरपश्चिमका बलर थारिन्दु रत्नायकेविरुद्ध विराटनगरले ३५ रन प्रहार गरेको थियो, जसमा ओपनिङमा आएका सेहन जयसूर्याले ५ छक्का प्रहार गरे भने एक बाई चौकासमेत जोडिएको थियो। जयसूर्याले मात्र ११ बलमा ५ छक्का र २ चौकासहित ३९ रन बनाएर आउट भए भने अर्का ओपनर लोकेश बमले २५ रन जोडे। त्यस्तै, विष्फोटक ब्याट्सम्यान एन्ड्रे रसेलले १० बल खेल्दै २ चौका र ३ छक्काको मद्दतमा अविजित २९ रन बनाए। सुदूरपश्चिमका लागि अविनाश बोहराले दुवै विकेट लिएका थिए।

जवाफमा १ सय ६ रनको कडा लक्ष्य पछ्याएको सुदूरपश्चिम रोयल्सले निर्धारित ५ ओभरमा ३ विकेट गुमाएर ७० रन मात्र बनाउन सक्यो। सुदूरपश्चिमका लागि स्कट कुग्लेनले ६ बलमा १ चौका र ४ छक्का प्रहार गर्दै २८ रन बनाए भने आरिफ शेखले १७ र सैफ जैबले १७ रन जोडे। ओपनिङ ब्याट्सम्यान सेरफन रदरफोर्ड पहिलो बलमै एन्ड्रे रसेलको बलमा बोल्ड भए भने कप्तान दीपेन्द्रसिंह ऐरी ५ बलमा मात्र १ रन बनाएर आउट भए। विराटनगरका लागि रसेल, एन्जेलो म्याथ्युज र रुपेश सिंहले समान १–१ विकेट हात पारे।

यस जितसँगै विराटनगरले आफ्नो तेस्रो खेलमा आएर पहिलो विजय हात पारेको छ भने पछिल्ला दुई सिजनको उपविजेता सुदूरपश्चिमको पनि ३ खेलमा २ हार र १ जितको नतिजा आएको छ। छोटाइएको ओभरमा देखिएको रोमाञ्चक र चौका–छक्काको वर्षाले खेलप्रेमी दर्शकहरूलाई भरपूर मनोरञ्जन प्रदान गरेको थियो।