कुलेखानी जलाशयमा पानीको सतह बढ्दै : तल्लो तटीय क्षेत्रका बासिन्दालाई सतर्क रहन आग्रह, ढोका खोल्न सक्ने चेतावनी

हेटौँडा, कात्तिक १४ गते । निरन्तरको वर्षाका कारण मकवानपुरको इन्द्रसरोवर गाउँपालिकास्थित कुलेखानी जलाशय (इन्द्रसरोवर ताल) मा पानीको सतह लगातार बढ्दै गएको छ।

जलाधार क्षेत्रमा भइरहेको भारी वर्षाका कारण जलाशयको सन्तुलन कायम राख्न जुनसुकै बेला ड्यामका ढोकाहरू खोल्नुपर्ने अवस्था आउन सक्ने भन्दै नेपाल विद्युत् प्राधिकरणले तल्लो तटीय क्षेत्रका बासिन्दालाई सतर्क रहन आग्रह गरेको छ। ड्यामको ढोका खोल्नुपर्ने अवस्था आएमा सर्वसाधारणलाई पूर्वजानकारी दिनका लागि चेतावनीयुक्त साइरन बजाइने र एसएमएसमार्फत सूचना प्रवाह गरिने कुलेखानी प्रथम जलविद्युत् केन्द्रले जनाएको छ।

कुलेखानी प्रथम जलविद्युत् केन्द्रका प्रबन्धक प्रल्हाद राउतका अनुसार जलाशयको कुल पूर्ण क्षमता १ हजार ५३० मिटर रहेकामा शनिबार दिउँसो १२ः१५ बजेसम्म पानीको सतह बढेर १ हजार ५२८.२० मिटर पुगिसकेको छ। पानीको सतह अझै बढेमा नियममानुसार क्रमशः तीन चरणमा एसएमएस पठाएर मात्रै ड्यामका ढोका खोल्ने प्रक्रिया अघि बढाइने उहाँले स्पष्ट पार्नुभएको छ। यस आपतकालीन अवस्थालाई मध्यनजर गर्दै केन्द्रले नदीकिनार आसपास बसोबास गर्ने नागरिकहरूलाई खोला किनारबाट टाढा अग्ला र सुरक्षित स्थानमा रहन विशेष अनुरोध गरेको छ।

मकवानपुरका प्रमुख जिल्ला अधिकारी वसन्त अधिकारीले पनि नदी आसपासका क्षेत्रमा बसोबास गर्ने बासिन्दाहरूलाई उच्च सतर्कता अपनाउन निर्देशन दिनुभएको छ। विपद्को सम्भावित जोखिमबाट बच्न जलविद्युत् आयोजनाबाट जारी हुने आधिकारिक सूचनाहरू तथा मोबाइलमा प्राप्त हुने एसएमएस सन्देशहरूमा उल्लेखित निर्देशनहरूको पूर्ण रूपमा पालना गर्न उहाँले अनुरोध गर्नुभएको छ।

साथै, यस क्षेत्रको देउराली–सिस्नेरी सडकखण्ड प्रयोग गर्ने यात्रु तथा चालकहरूलाई समेत उच्च सावधानी अपनाउन आग्रह गरिएको छ।

वर्षाका कारण बढ्न सक्ने जोखिमलाई ध्यानमा राख्दै स्थानीय प्रशासन र सुरक्षा निकायहरू पनि सम्भावित घटनाको पूर्वतयारी तथा अनुगमनमा जुटेका छन्। तल्लो तटीय क्षेत्रका बासिन्दालाई सुरक्षित राख्न र कुनै पनि मानवीय क्षति हुन नदिन सबै पक्षलाई सचेत गराइएको छ।