प्रधानन्यायाधीश र न्यायाधीशको नाम जोडिएका समाचारप्रति सर्वोच्च बारको गम्भीर ध्यानाकर्षण : निष्पक्ष छानबिन गरी सत्यतथ्य सार्वजनिक गर्न माग

काठमाडौँ, कात्तिक १३ गते । सर्वोच्च अदालत बार एसोसिएसनले सर्वोच्च अदालतका प्रधानन्यायाधीश र न्यायाधीशहरूको नाम जोडिएर हालै सार्वजनिक भएका समाचारहरूप्रति गम्भीर ध्यानाकर्षण भएको जनाउँदै यसबारे छानबिन गरी सत्यतथ्य सार्वजनिक गर्न माग गरेको छ।

बारका सचिव रमणकुमार कर्णले शुक्रबार एक विज्ञप्ति जारी गर्दै विगत केही दिनदेखि प्रकाशित समाचारहरूले न्यायपालिकाको स्वतन्त्रता, निष्पक्षता, गरिमा र जनविश्वासमा गहिरो आघात पुर्‍याएको तथ्यलाई नकार्न नसकिने स्पष्ट पार्नुभएको छ। न्यायालयभित्र उठेका यस्ता गम्भीर विषयहरूले समग्र न्याय प्रणालीको विश्वसनीयतामाथि प्रश्नचिह्न खडा गरेको बारको निष्कर्ष छ।

हालै सम्पत्ति शुद्धीकरणको अनुसन्धानका क्रममा थुनामा रहेका इनम सापकोटासँग न्यायाधीश हरिप्रसाद फुयालको ह्वाट्सएपमार्फत कुराकानी भएको र हिमालय होटलमा भेट भएको विषयले न्यायक्षेत्र तातेको छ। यस सन्दर्भमा, न्यायपालिकाको स्वतन्त्रता र न्यायिक मर्यादालाई अक्षुण्ण राख्दै न्यायाधीशहरूलाई निर्भिकतापूर्वक न्याय सम्पादन गर्ने वातावरण बनाउनुपर्नेमा बारले जोड दिएको छ। प्रकाशित समाचार सामग्रीहरू, न्यायाधीशहरूबाट आएका विज्ञप्ति तथा अभिव्यक्तिहरूको आधारमा पूर्वाग्रही नभई साधिकार निकायमार्फत निष्पक्ष छानबिन गर्नुपर्ने माग विज्ञप्तिमा गरिएको छ।

यसका साथै, संवैधानिक इजलास गठनसम्बन्धी विवाद, न्यायिक कार्यमा हुने बाहिरी प्रभाव तथा न्याय सम्पादनमा बिचौलियाहरूको संलग्नताले अदालतको संस्थागत विश्वसनीयता र जनआस्थामा ठुलो ह्रास ल्याएको निष्कर्ष सर्वोच्च बारले निकालेको छ। अदालतप्रतिको जनविश्वास जोगाउन र न्याय प्रणालीलाई थप पारदर्शी बनाउन पनि यी विषयहरूको निष्पक्ष छानबिन अपरिहार्य रहेको बारको निष्कर्ष छ।

न्यायपालिकाको गरिमा उच्च राख्न र नागरिकको आस्था जोगाउन सम्बन्धित सबै पक्ष जिम्मेवार बन्नुपर्नेमा बारले जोड दिएको छ। पछिल्लो घटनाक्रमले न्यायालयभित्र देखिएका नीतिगत तथा नैतिक प्रश्नहरूलाई समयमै सम्बोधन गर्नुपर्ने आवश्यकता औँल्याएको छ।