एनपीएल : जनकपुर बोल्ट्ससामु जितका लागि ११६ रनको लक्ष्य, काठमाण्डू गोर्खाज ११५ रनमै समेटियो

काठमाडौँ, कात्तिक १२ गते । नेपाल प्रिमियर लिग (एनपीएल) को तेस्रो संस्करणअन्तर्गत आज भएको खेलमा काठमाण्डू गोर्खाजले जनकपुर बोल्ट्ससामु सामान्य लक्ष्य प्रस्तुत गरेको छ।

त्रिवि अन्तर्राष्ट्रिय क्रिकेट मैदानमा टस जितेर पहिले ब्याटिङको निर्णय गरेको काठमाण्डू गोर्खाजले इनिङ्सको १९.३ ओभरमा सबै विकेट गुमाएर जम्मा ११५ रन मात्र बनाउन सक्यो। डेविड वार्नर यस खेलमा अनुपस्थित रहेको र आगामी आइतबार मात्र नेपाल आउने कार्यक्रम रहेकोले काठमाण्डूले उनीबिना नै मैदान उत्रनुपरेको थियो।

जनकपुर बोल्ट्सका बलर राहुल यादवले उत्कृष्ट बलिङ प्रदर्शन गर्दै काठमाण्डूको ब्याटिङ लाइनअप ध्वस्त पार्नुभयो। उहाँले आफ्नो कोेटाको ४ ओभरमा ३१ रन खर्चेर महत्त्वपूर्ण ४ विकेट लिन सफल हुनुभयो। त्यस्तै, सैफ हसनले २ तथा मोइन अली, कप्तान हर्मीत सिंह र ललित राजवंशीले समान १–१ विकेट हात पारे। काठमाण्डूका लागि भीम सार्कीले सर्वाधिक ३३ रन (२९ बलमा ४ चौका) बनाउनुबाहेक अन्य ब्याटरहरूले क्रिजमा टिकेर खेल्न सकेनन्।

टिमको स्कोर ६ रन हुँदा पहिलो विकेट गुमाएको काठमाण्डूले नियमित अन्तरालमा विकेट गुमाउने क्रम रोकन सकेन। रसिद खानले १७, स्मित पटेलले १३, सुमित महर्जनले १० र कप्तान करण केसीले ८ रन बनाए। जहानदाद खान (५), रिपोन मोन्डल (९) र हरिशङ्कर शाह (९) ले पनि सस्तैमा पभेलियन फर्किन बाध्य भए। मोहम्मद आदिल आलम खाता खोल्नै नपाई पहिलो बलमै एलबीडब्ल्यू आउट भए भने शाहव आलम ४ रनमा अविजित रहे।

यससँगै जनकपुर बोल्ट्सले पहिलो खेलमा जित हासिल गर्न ११६ रनको लक्ष्य पाएको छ। पहिलो खेलमा अनुपस्थित रहेका विदेशी खेलाडीहरूको व्यवस्थापन र टोलीको रणनीतिक परिवर्तनबीच जनकपुरले अब यो सामान्य लक्ष्य कसरी पूरा गर्छ भन्नेमा दर्शकको नजर टिकेको छ।