भोटेकोशी बाढीका कारण घरपरिवार र व्यवसायतर्फ करिब ७९ अर्ब १७ करोड रुपियाँ बराबरको क्षति: राष्ट्रिय योजना आयोग

काठमाडौँ, कात्तिक ११ गते । रसुवाको भोटेकोशीमा आएको बाढीका कारण घरपरिवार र विभिन्न व्यवसायतर्फ गरी कुल ७९ अर्ब १७ करोड रुपियाँ बराबरको ठुलो धनजनको क्षति भएको छ।

राष्ट्रिय योजना आयोगले हालै सार्वजनिक गरेको घरपरिवार तथा प्रतिष्ठानसँग सम्बन्धित सर्वेक्षणको प्रारम्भिक विवरणअनुसार बाढीले घरपरिवारतर्फ ६९ अर्ब ५७ करोड र व्यवसायतर्फ ९ अर्ब ६० करोड रुपियाँको क्षति पुर्‍याएको छ। यस विपद्का कारण धादिङ, गोरखा, नुवाकोट र रसुवा जिल्लाका १५ स्थानीय तहका हजारौँ नागरिक प्रत्यक्ष रूपमा प्रभावित हुन पुगेका छन्।

सर्वेक्षणको तथ्यांक अनुसार बाढीले ५४.६५ हेक्टर जग्गामा क्षति पुर्‍याएको छ भने घडेरीमा १३ अर्ब २६ करोड र घर निर्माण लागततर्फ ११ अर्ब ९५ करोड रुपियाँको नोक्सानी भएको छ। त्यस्तै, ३ हजार ६१० परिवारको ५०७.९७ हेक्टर जग्गामा ३५ अर्ब ४४ करोड, खेतबारीको बालीमा २३ करोड २१ लाख, भण्डारण गरिएको खाद्यान्नमा १० करोड ४१ लाख तथा पशुपन्छीतर्फ २१ करोड ४२ लाख रुपियाँबराबरको क्षति भएको छ।

यसैगरी, १ हजार ११५ परिवारको सवारीसाधनतर्फ १ अर्ब २४ करोड र बहुमूल्य तथा पुरातात्त्विक वस्तुतर्फ ५ अर्ब २ लाख रुपियाँको क्षति पुगेको छ।

राष्ट्रिय योजना आयोगले चारवटै प्रभावित जिल्लामा ५८ टोली र १५६ जना कर्मचारी परिचालन गरेर अनलाइन एप र ट्याब्लेटमार्फत उक्त सर्वेक्षण सम्पन्न गरेको हो। बाढीका कारण कुल २ हजार ९८९ वटा आवासीय संरचनामा पूर्ण क्षति पुगेको छ भने समग्रमा ६ हजार ८१७ परिवार, ३२ हजार ८७२ व्यक्ति र ४९९ प्रतिष्ठान प्रभावित भएको तथ्यांकले देखाएको छ। यस प्रकारको ठुलो क्षतिले प्रभावित क्षेत्रको पुनरुत्थान र पुनर्निर्माणमा व्यापक कसरत गर्नुपर्ने आवश्यकता देखाएको छ।