एमालेको राष्ट्रिय भेलाको तयारी तीव्र : मंसिर २ र ३ गते हुने भेलामा ३ हजार बढी प्रतिनिधि सहभागी हुने

काठमाडौँ, कात्तिक १० गते। नेकपा (एमाले) को आगामी मङ्सिर २ र ३ गते आयोजना हुने राष्ट्रिय भेलाको तयारी तीव्र पारिएको छ। तयारीकै क्रममा मङ्गलबार पार्टी केन्द्रीय कार्यालयमा उपाध्यक्ष विष्णु पौडेलको प्रमुख आतिथ्यतामा दोस्रो बैठक सम्पन्न भएको छ।

बैठकलाई सम्बोधन गर्दै उपाध्यक्ष पौडेलले पार्टीको आन्तरिक जीवन, राष्ट्रिय तथा अन्तर्राष्ट्रिय परिस्थिति र जनजीविकाका सवालमा सिङ्गो पार्टी पङ्क्तिमा एउटै बुझाइ र लय विकास गर्नु राष्ट्रिय भेलाको मुख्य उद्देश्य रहेको स्पष्ट पार्नुभयो। साथै, २०८२ सालको निर्वाचनको परिणामलाई क्षणिक धक्का भन्दै एमालेलाई पुरानै राजनीतिक धारमा फर्काउन र आगामी स्थानीय तहको निर्वाचनमा प्रभावकारी रूपमा प्रस्तुत हुन यो भेला कोसेढुङ्गा साबित हुने विश्वास व्यक्त गर्नुभयो।

बैठकमा पार्टी महासचिव शङ्कर पोखरेलले राष्ट्रिय भेलालाई सफल बनाउन सबै नेता तथा कार्यकर्ताहरूलाई सक्रियतापूर्वक परिचालित हुन र यसको सन्देश जनस्तरसम्म पुर्‍याउन व्यापक प्रचारप्रसारमा जुट्न आग्रह गर्नुभयो।

त्यस्तै, बैठकको अध्यक्षता गर्नुभएका पार्टी सचिव तथा सङ्गठन विभाग प्रमुख भानुभक्त ढकालले अहिलेसम्म भएका तयारीका कामहरूबारे जानकारी गराउनुभयो। उहाँले राष्ट्रिय भेलामा केन्द्रीय कमिटी, विभिन्न निकाय, प्रदेश, जिल्ला, स्थानीय तह, जनसङ्गठन तथा जनप्रतिनिधिसहित कुल ३ हजार १६४ जनाको सहभागिता रहने जानकारी दिनुभयो।

एमालेका अनुसार यस राष्ट्रिय भेलाले पार्टीभित्रको आन्तरिक एकतालाई थप सुदृढ बनाउने, सङ्गठनलाई गतिशील तुल्याउने र आगामी राजनीतिक चुनौतीहरूको सामना गर्न पार्टी पङ्क्तिलाई एकताबद्ध रूपमा परिचालन गर्ने महत्वपूर्ण अवसर प्रदान गर्नेछ। सडकको सङ्घर्ष होस् वा निर्वाचनको तयारी, दुवै मोर्चामै दृढतापूर्वक अघि बढ्ने राजनीतिक सन्देश यो भेलाले दिने एमालेको ठहर छ।