ट्राफिक नियम उल्लंघन गर्ने चालकविरुद्धको कारबाही तीव्र : २४ दिनमा १३ सय बढी चालक कारबाहीमा, मापसेमा मात्र १२२५ जना पक्राउ !

काठमाडौँ, कात्तिक १० गते । काठमाडौं उपत्यका ट्राफिक प्रहरी कार्यालयले ट्राफिक नियम उल्लंघन गर्ने चालकहरूविरुद्धको कारबाहीलाई थप कडा तथा तीव्र बनाएको छ। कार्यालयबाट प्राप्त आधिकारिक विवरण अनुसार गत असोज २५ देखि कात्तिक १० गतेसम्मको २४ दिनको अवधिमा कुल १ हजार ३६६ जना चालकहरू विभिन्न कसुरमा कारबाहीमा परेका छन्।

सडक सुरक्षालाई मध्यनजर गर्दै प्रहरीले मादक पदार्थ तथा लागूपदार्थ सेवन गरी सवारी चलाउनेहरूमाथि विशेष निगरानी बढाएको छ।

कार्यालयको तथ्यांक अनुसार उक्त २४ दिनको अवधिमा मादक पदार्थ सेवन गरेर (मापसे) सवारी चलाउने १ हजार २२५ जना चालक कारबाहीमा परेका छन्, जसले दैनिक औसत ५० जनाभन्दा बढी चालक मापसेमा पक्राउ परेको देखाउँछ। यसबाहेक, यान्त्रिक गडबडी भएका सवारी साधन चलाउने १०४ जना र लागूपदार्थ सेवन गरेर (लापसे) सवारी हाँक्ने ३७ जना चालक पनि कारबाहीमा परेका छन्।

त्यस्तै, सार्वजनिक (भाडाका) सवारी चलाउने ४७ जना चालक पनि कारबाहीमा परेका छन्, जसमध्ये ७ जना मापसे र ४० जना लापसेको अभियोगमा फन्दामा परेका हुन्।

काठमाडौं उपत्यका ट्राफिक प्रहरी कार्यालयका प्रमुख सुरेन्द्र काफ्लेले सडक दुर्घटना न्युनीकरण गर्न र सुरक्षित यात्रा सुनिश्चित गर्न सबै चालकलाई ट्राफिक नियमको पूर्ण पालना गर्न तथा जिम्मेवार बन्न आग्रह गर्नुभएको छ। प्रहरीको यस प्रकारको कडा निगरानीले सडक अनुशासन कायम गर्न महत्त्वपूर्ण सहयोग पुग्ने अपेक्षा गरिएको छ।