त्रिवि क्रिकेट रंगशाला वरपरको सडक तीन महिनाभित्र कालोपत्र हुने : सडक डिभिजनद्वारा द्रुत प्रक्रियामा ठेक्का आह्वान

काठमाडौँ, कात्तिक १० गते । कीर्तिपुरस्थित त्रि.वि. अन्तर्राष्ट्रिय क्रिकेट रंगशाला वरपरको सडक आगामी तीन महिनाभित्र कालोपत्र गर्नेगरी सडक डिभिजन कार्यालय काठमाडौंले ठेक्का आह्वान गरेको छ।

मूल बाटोबाट क्रिकेट मैदान जोड्ने विभिन्न सडकखण्ड गरी करिब डेढ किलोमिटर क्षेत्रलाई कालोपत्र गर्न ६ करोड ९८ लाख रुपैयाँ लागत अनुमान गरिएको छ। हाल कच्ची सडकका कारण उड्ने धुलोले खेलप्रेमी, खेलाडी तथा नेपाल क्रिकेट संघ (क्यान) लाई पारेको असुविधालाई मध्यनजर गर्दै सरकारले द्रुत प्रक्रियामार्फत यो कार्य अघि बढाएको हो।

सडक डिभिजन कार्यालय काठमाडौंका प्रमुख सुबोधकुमार देवकोटाका अनुसार निर्माण कम्पनीहरूका लागि तीन दिनसम्म बिड डकुमेन्ट किन्न र कात्तिक १२ गतेभित्र पेश गर्न समयसीमा तोकिएको छ। प्राविधिक तथा आर्थिक मूल्याङ्कनको सबै प्रक्रिया पूरा गरी १५ देखि २० दिनभित्र निर्माण कम्पनीसँग सम्झौता गरिने र सम्झौता भएको मितिले तीन महिनाभित्र कालोपत्रको काम पूर्ण रूपमा सम्पन्न गर्ने लक्ष्य राखिएको छ।

यसअघि नै एनपिएल सुरु हुनुअघि ६० ट्रक ग्रावेल खसालेर हिँडडुल सहज बनाइएको र अब कालोपत्र भएपछि मैदान थप सुविधा-सम्पन्न बन्ने क्यानका उपाध्यक्ष रोशनकुमार सिंहले बताएका छन्।

नेपालले बंगलादेशसँगको सहकार्यमा पहिलो पटक आयोजना गर्न लागेको यु–१९ महिला विश्वकप क्रिकेट प्रतियोगिता आगामी माघ ९ गते (जनवरी २३) बाट सुरु हुँदैछ। उक्त प्रतियोगिताका अधिकांश खेलहरू कीर्तिपुर मैदानमै हुने भएकाले समयमै सडक निर्माण सम्पन्न हुँदा खेलाडी, दर्शक तथा अतिथिहरूलाई आवत-जावत गर्न अत्यन्त सहज हुनेछ। छिटो प्रक्रियाबाट विकास निर्माणको काम अघि बढेकोमा खेल क्षेत्रका पदाधिकारी तथा क्यानको टिमले खुसी व्यक्त गरेका छन्।