कोशीटप्पुको ‘बेम्बो केभ’ बन्दै आन्तरिक पर्यटकको आकर्षणको केन्द्र, दैनिक बढ्दै चहलपहल

सुनसरी, कात्तिक ९ गते। कोशीटप्पु वन्यजन्तु आरक्षको उत्तरी सिमानामा रहेको ‘बेम्बो केभ’ (बाँसको सुरुङ) पछिल्लो समय आन्तरिक पर्यटकको प्रमुख आकर्षणको केन्द्र बन्दै गएको छ। प्राकृतिक बनावट र सुन्दर दृश्यले भरिपूर्ण यस स्थानमा फोटो खिच्न, टिकटक बनाउन तथा प्राकृतिक वातावरणमा रमाउन आउने पर्यटकहरूको सङ्ख्या दिन-प्रतिदिन बढिरहेको छ।

सुनसरीको बराहक्षेत्र नगरपालिका–९ स्थित धरहरा टप्पनमा आरक्षको तटबन्धमा रहेको यस बाँसको सुरुङमा पूर्वी नेपालका विभिन्न स्थानबाट युवापुस्ता तथा परिवारसहितका पर्यटकहरू पुग्ने गरेका छन्। दसैँ-तिहार जस्ता चाडपर्वका बेला आफन्तकहाँ आएका तथाघर फर्किएकाहरू समेत यहाँ घुम्न आउने गरेको स्थानीय पोस्टमा कार्यरत कर्मचारीहरूले बताएका छन्। सामाजिक सञ्जालमा समेत आकर्षक दृष्यहरू भाइरल भएपछि पर्यटकहरूको चहलपहल थप बढेको हो।

कोशीटप्पु वन्यजन्तु आरक्षका प्रमुख तथा संरक्षण अधिकृत भुपेन्द्रप्रसाद यादवले बेम्बो केभमा पर्यटकको आकर्षण बढ्दा आरक्षको आन्तरिक आम्दानीमा पनि वृद्धि भइरहेको जानकारी दिनुभएको छ। यहाँ आउने पर्यटकहरूले चरा, अर्ना तथा अन्य वन्यजन्तुको अवलोकनसँगै बेम्बो केभको समेत भ्रमण गर्ने गरेका छन्। हिउँदको सुरुवातसँगै आरक्ष क्षेत्रमा आन्तरिक तथा बाह्य पर्यटकहरूको चहलपहल थप चलायमान हुने गरेको छ।

आरक्ष अवलोकनका लागि नेपाली नागरिकलाई प्रतिव्यक्ति एक सय रुपियाँ, सार्क राष्ट्रका नागरिकलाई सात सय ५० रुपियाँ र अन्य विदेशी नागरिकका लागि एक हजार पाँच सय रुपियाँ प्रवेश शुल्क तोकिएको छ। यसका साथै साना हलुका सवारीसाधनका लागि तीन सय रुपियाँको टिकट लिनुपर्ने व्यवस्था रहेको छ, जसले यस क्षेत्रको पर्यटन प्रवर्धनमा महत्त्वपूर्ण टेवा पुर्‍याएको छ।