सरकारद्वारा ‘प्रियागोल्ड’ ब्रान्डका बिस्कुटको पैठारी तथा बिक्री-वितरणमा पूर्ण रोक : गाईवस्तुको दाना प्रयोग भएको पाइएपछि प्रतिबन्ध

काठमाडौँ, कात्तिक ९ गते । सरकारले भारतको सूर्या फुड एन्ड एग्रो लिमिटेड द्वारा उत्पादित ‘प्रियागोल्ड’ ब्रान्डका सम्पूर्ण बिस्कुटको पैठारी, सीमानाका प्रवेश र नेपालभित्र बिक्रीवितरणमा पूर्ण रोक लगाएको छ।

खाद्य प्रविधि तथा गुण नियन्त्रण विभागले उक्त ब्रान्डका बिस्कुटहरू मानव उपभोगका लागि असुरक्षित र अयोग्य रहेको पाइएपछि यो कठोर कदम चालेको हो। यसअघि नै भारतमा समेत मानव खपतका लागि रोक लगाइएका यी बिस्कुटहरू नेपालमा पनि आयात भई बिक्री भइरहेकोले खाद्य स्वच्छता तथा गुणस्तर ऐनविपरीत ठहर गर्दै विभागले प्रतिबन्ध लगाएको हो।

भारतीय खाद्य सुरक्षा तथा मानक प्राधिकरण (एसएसएआई) को परीक्षणमा प्रियागोल्ड बिस्कुटको उत्पादनमा गाईवस्तुको दानाका रूपमा प्रयोग हुने चोकरलाई रेसा वा फाइबरको स्रोतका रूपमा मिसाइएको रहस्य खुलेको थियो। जुन चोकर राखिएका जुटका बोराहरूमा स्पष्ट रूपमा ‘गाईवस्तुको दानाका लागि’ र ‘मानव उपभोगका लागि नभएको’ लेखिएको थियो।

साथै, उत्पादन कारखानामा गम्भीर लापर्बाही, कीट नियन्त्रणमा कमी र सरसफाइको अभाव देखिएपछि एसएसएआईले उत्पादक कम्पनीको इजाजतपत्र निलम्बन गर्दै अभियोजन प्रक्रियासमेत अघि बढाइसकेको छ।

विभागका महानिर्देशक सञ्जीवकुमार कर्णको उपस्थितिमा बसेको उच्च व्यवस्थापन समूह र प्राविधिक समितिको बैठकको सिफारिसमा नेपालका आधिकारिक पैठारीकर्ता तथा व्यवसायीहरूलाई बजारमा रहेका सबै ब्याचका प्रियागोल्ड बिस्कुटहरू तत्काल फिर्ता गर्न निर्देशन दिइएको छ।

यदि यी उत्पादनहरू नष्ट गर्नुपर्ने भएमा स्थानीय प्रशासन र विभागका प्राविधिकहरूको रोहबरमा नष्ट गरी जानकारी गराउनुपर्नेछ। अर्को आदेश नभएसम्मका लागि सीमानाकाबाट हुने पैठारी पूर्ण रूपमा स्थगित गरिएको छ भने विभागको निर्देशनविपरीत बिक्रीवितरण गरेमा प्रचलित कानुनबमोजिम कडा कारबाही हुने चेतावनीसमेत दिइएको छ।