नागढुङ्गा सुरुङमार्ग सञ्चालनमा आएपछि पुरानो सडक सुनसान : सवारीसाधन घट्दा स्थानीय व्यापारमा असर, मोटरसाइकल चालकलाई राहत

काठमाडौँ, कात्तिक ९ गते । नागढुङ्गा–सिस्नेखोला सुरुङमार्ग सञ्चालनमा आएसँगै काठमाडौँबाट पृथ्वी राजमार्गलाई जोड्ने थानकोट–नागढुङ्गाको पुरानो सडक हिजोआज सुनसान बन्न पुगेको छ।

कलङ्कीबाट बाहिरिने अधिकांश सवारीसाधनहरू बलम्बुबाट सुरुङमार्गतर्फ प्रवेश गर्ने गरेका कारण पुरानो मार्गमा सवारीको चाप ह्वात्तै घटेको छ। सुरुङमार्ग प्रयोग गर्दा समय र इन्धन दुवैको बचत हुने भएकाले चालकहरूको पहिलो रोजाइ सुरुङमार्ग बनेको छ। २.६८ किलोमिटर लामो सुरुङमार्ग पार गर्न ७ देखि १० मिनेट मात्र लाग्ने भए तापनि पुरानो उकालो बाटोमा धेरै समय र इन्धन खर्च हुने भएकाले सवारीसाधनहरू सुरुङतर्फ आकर्षित भएका हुन्।

सवारीसाधनको आवागमन घटेसँगै नागढुङ्गा चेकपोस्टसमेत अहिले शान्त बन्न पुगेको छ भने त्यहाँ खटिने सुरक्षाकर्मीको सङ्ख्या र व्यस्तता पनि घटेको छ। सवारीसाधन नै नगुड्ने भएपछि त्यस क्षेत्रका स्थानीय पसलेहरूको व्यापारमा प्रत्यक्ष नकारात्मक प्रभाव परेको छ र आम्दानीसमेत घटेको गुनासो सुनिन थालेको छ।

यद्यपि, सुरुङमार्गमा पैदलयात्री, दुईपाङ्ग्रे, तीनपाङ्ग्रे तथा प्रज्वलनशील पदार्थ बोकेका सवारीसाधनलाई प्रवेश निषेध गरिएको हुनाले दुईपाङ्ग्रे (मोटरसाइकल) चालकहरूका लागि भने यो पुरानो बाटो निकै सहज र आरामदायक बनेको छ।

विसं २०७६ कात्तिक ४ गते शिलान्यास गरिएको यो सुरुङमार्ग २०८३ साउन ११ गते उद्घाटन भई सञ्चालनमा आएको हो। सुरुङमार्गको प्रवेशद्वारमा कुनै जाम वा आकस्मिक समस्या देखिएमा मात्र पुराना बाटोमा सवारीसाधन मोड्ने गरिएको छ। ठूला तथा यात्रुवाहक सवारीसाधनहरू सुरुङमार्ग भएरै आवत-जावत गर्ने हुँदा पुरानो सडक क्षेत्र शान्त बनेको छ भने मोटरसाइकल चालकहरूले बिनाअवरोध र जाम यात्रा गर्न पाएकोमा खुसी व्यक्त गरेका छन्।