प्रधानमन्त्री वालेन्द्र शाह नेपाल प्रिमियर लिग (एनपिएल) को उद्घाटनमा सहभागी हुने, फेसबुकमार्फत दिए शुभकामना

काठमाडौँ, कात्तिक ९ गते । प्रधानमन्त्री वालेन्द्र शाह नेपाल प्रिमियर लिग (एनपिएल) क्रिकेटको तेस्रो संस्करणको उद्घाटन समारोहमा सहभागी हुने भएका छन्।

प्रधानमन्त्रीकी प्रेस विज्ञ दीपा दाहालले प्रधानमन्त्री शाह आज हुने एनपिएलको उद्घाटनमा प्रत्यक्ष रूपमा उपस्थित भई सहभागिता जनाउने जानकारी दिएकी छिन्। दिउँसो ५ बजे सुरु हुने उद्घाटन खेलको पूर्वसन्ध्यामा प्रधानमन्त्री शाहले कीर्तिपुर जानुअघि सामाजिक सञ्जाल फेसबुकमार्फत सम्पूर्ण खेलप्रेमी, खेलाडी तथा आयोजकहरूलाई शुभकामना सन्देशसमेत दिनुभएका छन्।

आफ्नो शुभकामना सन्देशमा प्रधानमन्त्री शाहले एनपिएल नेपालको सबैभन्दा ठूलो खेलकुद प्रतियोगिता भएको र निकै छोटो अवधिमै यसले एउटा भव्य खेलकुद उत्सवको रूप लिन सफल भएको बताउनु भएका छन्। उहाँले प्रतियोगितामा सहभागी हुन नेपाल आएका सम्पूर्ण अन्तर्राष्ट्रिय खेलाडी तथा कमेन्टेटरहरूलाई हार्दिक स्वागत गर्दै यस भव्य प्रतियोगिताको सफल आयोजनाका लागि नेपाली खेलाडी, आयोजक तथा नेपाल क्रिकेट संघ (क्यान) लाई शुभकामना व्यक्त गर्नुभएका छन्।

त्रिवि अन्तर्राष्ट्रिय क्रिकेट मैदानमा आजदेखि सुरु हुने यस प्रतियोगिताको तेस्रो संस्करणमा देशविदेशका चर्चित स्टार खेलाडीहरूको सहभागिता रहेको छ। प्रधानमन्त्री स्वयम् उद्घाटन समारोहमा उपस्थित हुने भएपछि यसले खेलाडीहरूको मनोबल उच्च हुनुका साथै नेपाली घरेलु क्रिकेटको सुदृढीकरणमा सरकारको उच्च प्राथमिकता रहेको स्पष्ट सन्देश दिएको छ।