गुल्मीमा ५५.९२ प्रतिशत नागरिक स्वास्थ्य बिमामा आबद्ध, १ लाख ३७ हजारभन्दा बढीले लिए सेवा

गुल्मी, कात्तिक ७ गते। गुल्मी जिल्लामा सामाजिक सुरक्षाअन्तर्गत सरकारले सञ्चालन गरेको स्वास्थ्य बिमा कार्यक्रममा ५५ दशमलव ९२ प्रतिशत नागरिक आबद्ध भएका छन्।

स्वास्थ्य उपचारमा सर्वसाधारणको सहज पहुँच स्थापित गर्ने लक्ष्यसहित जिल्लामा २०७६ साल माघ १९ गतेदेखि यो कार्यक्रम सुरु गरिएको थियो। स्वास्थ्य बिमा बोर्ड सम्पर्क शाखा कार्यालय गुल्मीका संयोजक सुवास घिमिरेका अनुसार हालसम्म जिल्लाका एक लाख ३७ हजार ८४५ जनाले स्वास्थ्य बिमा गराइसकेका छन्। दुई नगरपालिका र दश गाउँपालिका रहेको यस जिल्लामा ६६ हजार ९९० पुरुष र ७० हजार ८५५ महिलाले बिमाको सुविधा लिएका छन्।

बिमाको महत्त्व र प्रभावकारिता बुझ्दै गएपछि नागरिकहरूको सहभागिता बढ्दै गएको छ, जसमा सबैभन्दा बढी रेसुङ्गा नगरपालिकामा २६ हजार ४९६ जनाले बिमा गराएका छन्।

यसैगरी, सत्यवती गाउँपालिकामा १६ हजार ६५३ र रुरुक्षेत्र गाउँपालिकामा १४ हजार ७३२ जना नागरिक बिमाको दायरामा आएका छन्। सरकारको नीतिअनुसार ज्येष्ठ नागरिक (७० वर्ष माथिका) १८ हजार ९३९, एचआइभी संक्रमित, कुष्ठरोगी, ‘क’ वर्गका अपाङ्गता भएका व्यक्ति तथा जटिल खालका क्षयरोगीहरूलाई निःशुल्क स्वास्थ्य बिमाको व्यवस्था गरिएको छ। साधारणतर्फ भने २२ हजार ७९६ परिवारका एक लाख नौ हजार ६८१ जनाले यो सुविधा लिएका छन्।

जिल्लामा स्वास्थ्य बिमा सेवा प्रभावकारी बनाउन ३ जना दर्ता अधिकारी र ९४ जना दर्ता सहयोगीहरू खटिएका छन्। गुल्मी अस्पताल, जिल्ला आँखा उपचार केन्द्र तम्घास, विभिन्न आधारभूत तथा प्राथमिक स्वास्थ्य केन्द्रहरूबाट बिमा सेवा प्रदान हुँदै आएको छ। महिला स्वास्थ्य स्वयंसेविका परिवार तथा विभिन्न लक्षित समूहहरूको समेत सक्रिय सहभागिताले गुल्मीमा स्वास्थ्य बिमा कार्यक्रमको दायरा र प्रभावकारिता थप फराकिलो बन्दै गएको छ।