हेटौँडामा घरभित्रै पुरुष मृत फेला, घाइते अवस्थामा श्रीमतीको उद्धार

हेटौँडा, कात्तिक ७ गते । हेटौँडा उपमहानगरपालिका–८, भावनामार्गस्थित एक घरमा पुरुष मृत अवस्थामा फेला परेका छन् भने उनकी श्रीमती गम्भीर घाइते अवस्थामा उद्धार गरिएको छ।

शुक्रबार भएको यस घटनामा ४५ वर्षीय शंकर कार्की घरको दोस्रो तलामा मृत फेला परेका हुन् भने उनकी ४० वर्षीया श्रीमती चरिमाया कार्की भान्सा कोठामा घाइते अवस्थामा भेटिएकी छन्। जिल्ला प्रहरी कार्यालय मकवानपुरका अनुसार प्रारम्भिक अनुसन्धानमा घटनाका बेला घरमा श्रीमान्–श्रीमती मात्रै रहेको खुलेको छ।

घटनास्थलको रहस्य तब खुल्न थाल्यो जब माइती पक्षबाट फोन नउठेपछि रामेछापबाट हेटौँडा–९ की भवानी महतलाई खबर पुग्यो। भाइको घर पुग्दा ढोका भित्रबाट चुकुल लगाएको अवस्थामा फेला परेपछि स्थानीयको सहयोगमा प्रहरीलाई खबर गरिएको थियो। प्रहरी टोलीले स्थानीयको रोहवरमा ढोका फोडेर हेर्दा शंकर फलामको डन्डीमा सलको पासो लगाएको मृत अवस्थामा फेला परेका थिए भने बाहिरबाट चुकुल लगाइएको भान्सा कोठामा मुख, टाउको र खुट्टामा चोट लागेकी चरिमाया घाइते भेटिएकी थिइन्।

घाइते चरिमायालाई तत्काल हेटौँडा अस्पताल पुर्‍याइएकोमा थप उपचारका लागि चितवनको भरतपुर पठाइएको छ। घटनास्थलबाट रगत लागेको ढुङ्गाको लोहोरो र इँटासमेत बरामद गरिएको प्रहरीले जनाएको छ।

जिल्ला प्रहरी कार्यालय मकवानपुरका सूचना अधिकारी प्रहरी नायब उपरीक्षक माधवप्रसाद काफ्लेका अनुसार घटनाको कारण र परिस्थितिबारे सत्यतथ पत्ता लगाउन इलाका प्रहरी कार्यालय पशुपतिनगरबाट प्रहरी निरीक्षक किशोर आचार्यको नेतृत्वमा गहन अनुसन्धान अघि बढाइएको छ।