नेपाली चलचित्र ‘सेप अफ मोमो’ ले क्यानडामा जित्यो दुई प्रतिष्ठित अवार्ड, लन्डनमा विशेष प्रदर्शन हुने

काठमाडौँ, कात्तिक ६ गते । सिक्किमको जनजीवन र पृष्ठभूमिमा निर्माण भएको प्रशंसित नेपालीभाषी फिल्म ‘सेप अफ मोमो’ ले अन्तर्राष्ट्रिय चलचित्र महोत्सवहरूमा आफ्नो उत्कृष्ट सफलताको यात्रा निरन्तर जारी राखेको छ।

क्यानडामा सम्पन्न प्रतिष्ठित ‘इन्टरनेसनल फिल्म फेस्टिभल अफ साउथ एसिया’ (IFFSA) टोरन्टो २०२६ मा यस फिल्मले दुई प्रमुख विधामा शीर्ष पुरस्कार जिम्न सफल भएको छ। अक्टोबर ८ देखि १८ सम्म सञ्चालन भएको उक्त महोत्सवमा फिल्मकी मुख्य अभिनेत्री गौमाया गुरुङले ‘उत्कृष्ट अभिनेत्री’ र निर्देशक त्रिवेणी राईले ‘उत्कृष्ट निर्देशक’ को उपाधि हासिल गरेका हुन्।

पारिवारिक दायित्व र व्यक्तिगत स्वतन्त्रताको द्वन्द्वमा जेलिएकी एक महिलाको भूमिकामा गौमायाले दिएको स्वाभाविक र सूक्ष्म अभिनयको अन्तर्राष्ट्रियस्तरमा उच्च प्रशंसा भएको छ। यसअघि नै बुसान, कोलकाता, रसिया र लस एन्जलसजस्ता विश्वका प्रतिष्ठित महोत्सवहरूमा विभिन्न अवार्ड जितिसकेको यो फिल्म आगामी अक्टोबर ३० मा लन्डनस्थित सोआस युनिभर्सिटीमा विशेष प्रदर्शन हुने भएको छ।

खुला आकाश मिडिया, हाम्रो डबली र द क्रिटिकल हिमालयन कलेक्टिभको संयुक्त आयोजनामा हुने यस प्रदर्शनबाट संकलन हुने टिकट बिक्रीको निश्चित रकम नेपालका बाढीपीडित परिवारहरूको सहयोगार्थ प्रदान गरिने आयोजकले जनाएका छन्। विशेष शो पश्चात दर्शकहरूले अभिनेत्री गौमाया गुरुङ र पशुपति राईसँग प्रत्यक्ष अन्तरक्रिया गर्ने अवसरसमेत प्राप्त गर्नेछन्।

दिल्लीको जागिर छोडेर घर फर्किएकी ‘विष्णु’ नामक पात्रको माध्यमबाट फिल्मले सिक्किमका पहाडी समाजका परम्परागत मान्यता, पारिवारिक अपेक्षा, पहिचानको खोजी र लैङ्गिक विभेदका विषयलाई अत्यन्त मार्मिक ढङ्गले प्रस्तुत गरेको छ। माइक गुड्रिज, जोया अख्तर, रीमा कागती र पायल कपाडिया जस्ता ख्याति-प्राप्त फिल्म-मेकरहरू कार्यकारी निर्माता रहेको यस चलचित्रले अन्तर्राष्ट्रिय मञ्चमा नेपाली भाषा, कला र संस्कृतिको पहिचानलाई अझ उच्च बनाएको छ।