चलचित्र ‘कबड्डी ५’ ले पायो युनिभर्सल सर्टिफिकेट: सबै उमेर समूहले हेर्न पाउने

काठमाडौं, कात्तिक २ गते । रामबाबु गुरुङको निर्देशनमा बनेको बहुप्रतीक्षित नेपाली चलचित्र ‘कबड्डी ५’ ले चलचित्र जाँच समिति (सेन्सर बोर्ड) बाट ‘युनिभर्सल सर्टिफिकेट’ प्राप्त गरेको छ।

शुक्रबार प्राप्त यस प्रमाणपत्रसँगै अब यो सिनेमा सबै उमेर समूहका दर्शकहरूले हलमा गएर हेर्न पाउने भएका छन्। सेन्सर बोर्डका पदाधिकारीहरूले चलचित्रले अघिल्ला शृङ्खलाहरूझैँ सामाजिक कथालाई कमेडी शैलीमा प्रस्तुत गर्दै दर्शकलाई भरपूर मनोरञ्जन दिने प्रतिक्रिया दिएको निर्देशक गुरुङले बताएका छन्।

यस वर्षको दसैँको पर्सिपल्ट अर्थात् आगामी कात्तिक ६ गतेबाट प्रदर्शनमा आउने यस चलचित्रमा दयाहाङ राई, विपिन कार्की, विजय बराल, बुद्धि तामाङ, मिरुना मगर, रिश्मा गुरुङ र सिर्जना गुरुङ लगायतका चर्चित कलाकारहरूको मुख्य भूमिका रहेको छ।

चलचित्र ट्रेलरमा समेटिएको बेरोजगारीबाट दिक्क भएर काजी र उनको टोलीले मुस्ताङमा ‘शान्ति होटल’ खोली नयाँ व्यवसाय थालेको कथा, काजीको वैवाहिक जीवनका उतार-चढाव तथा विपिन कार्कीको ग्याङसँगको टक्करलाई दर्शकले अत्यधिक रुचाएका छन्। अघिल्ला चारवटै शृङ्खला ब्लकबस्टर भइसकेकाले पाँचौँ शृङ्खलाप्रति पनि दर्शकको अपेक्षा अत्यन्तै उच्च रहेको छ।